Ulytaý oblysynyń turǵyny úiin jóndeý kezinde sirek kezdesetin tarihi qarý taýyp aldy, dep habarlaidy ult.kz.
Ulytaý oblysy Jańaarqa aýdanynyń politsiia bólimine jergilikti turǵyn habarlasyp, satyp alǵan eski úiine jóndeý jumystaryn júrgizý barysynda kóne myltyq taýyp alǵanyn habarlady. Eń bastysy – azamat zań talaptaryn saqtap, qaýipti zatty dereý politsiia qyzmetkerlerine tapsyrǵan.
Tekserý barysynda tabylǵan buiymnyń jai ǵana qarý emes ekeni anyqtaldy. Ol – álemdik qarý-jaraq tarihynda erekshe orny bar, áigili konstrýktor Djon Mozes Braýning jasaǵan Browning Auto-5 tegis uńǵyly jartylai avtomatty myltyǵy bolyp shyqty. Atalǵan model 1898 jyly qurastyrylyp, 1905 jyldan bastap áskeri qurylymdar men quqyq qorǵaý organdarynyń qoldanysyna engizilgen. Sonymen qatar bul qarý Ekinshi dúniejúzilik soǵys kezinde de keńinen paidalanylǵan.
Qazirgi ýaqytta tabylǵan qarýǵa qatysty ballistikalyq saraptamalar taǵaiyndaldy. Mamandar onyń naqty shyǵarylǵan ýaqytyn jáne qandai da bir quqyq buzýshylyqtarǵa qatysynyń bar-joǵyn anyqtap jatyr.
Politsiia qyzmetkerleri qarýdy óz erkimen tapsyrǵan aýdan turǵynyna alǵys bildirdi. Tártip saqshylarynyń aitýynsha, bul áreket azamattyń jeke qaýipsizdikke ǵana emes, qoǵam tynyshtyǵyna da beijai qaramaitynyn kórsetedi.
Eske salaiyq, zańsyz saqtalǵan qarý-jaraqtardy, oq-dáriler men jarylǵysh zattardy óz erkimen politsiiaǵa tapsyrǵan azamattar, eger olardyń áreketterinde ózge quqyq buzýshylyq belgileri bolmasa, qylmystyq jáne ákimshilik jaýapkershilikten bosatylady.
