QR Ulttyq bankiniń basshysy Daniiar Aqyshev «Tsesnabank» AQ basyndaǵy jaǵdaiǵa qatysty túsinikteme berdi, dep habarlaidy QazAqparat tilshisi.
Onyń aitýynsha, bankte («Tsesnabank» AQ) jospardan tys jaǵdai bolǵan. Banktegi jeke jáne zańdy tulǵalardyń salymdarynyń shuǵyl aǵyny baiqaldy.
«Bazel-3 aiasyndaǵy ótimdilik boiynsha jańa koeffitsientterdiń engizilýine bailanysty Ulttyq bank Tsesnabankke 150 mlrd teńge kóleminde qaryz berdi. Bul qarjy bankke naryqtyq jaǵdaida kómek retinde berildi», - dedi Ulttyq bank basshysy.
Aqyshev bankterge kómek kórsetýde nege «ala qoidy bóle qyrqyp otyrǵanyn» aitty. Bas bankirdiń aitýynsha, Ulttyq bank ekinshi deńgeili bankterge problemalyq jaǵdai týyndaǵan jaǵdaida ǵana kómektesedi.
«Biz banktiń qalai basqarylyp otyrǵanyna, aktsionerlerdiń problemany sheshýge daiyndyǵyna mán beremiz. Kórip otyrǵanymyzdai, bank aktsionerleri qarjylyq ahýaldy turaqtandyrý úshin baryn salyp jatyr. Daǵdarysqa qarsy jańa menedjment taǵaiyndaldy. Onymen qosa, bank aýyl sharýashylyǵy salasyndaǵy 450 mlrd teńgelik nesie portfelin satý jóninde mámile júrgizip jatyr. Sebebi, kreditordy aýystyrý óz kezeginde agrosektor kásipkerleriniń jaǵdaiyn jaqsartady», - dedi ol.
Onyń aitýynsha, Ulttyq bank aktsionerlerdi emes, salymshylardyń aqshasyn qutqarýǵa baryn salýda.
«Biz aktsionerlerdi emes, azamattarymyz ben kásiporyndarymyzdyń aqshasyn saqtap qalýymyz kerek. Eshkim aqshany qaltasyna basyp almaidy. Aqsha klientterge qyzmet kórsetýge jumsalady. Eger naryqtaǵy úlesi joǵary banktiń basyna osyndai kún týsa, ol túgel ekonomika jáne qarjy sektoryna áser etýi múmkin. Bul qaryz Ulttyq bankke qaitady», - dedi Aqyshev.
Ulttyq bank 2019 jyldyń basynan bank salasyn baqylaýdyń táýekelge baǵyttalǵan túrin engizbek.
