Qazaqstannyń Ulttyq qaýipsizdik komiteti belgiialyq kásipker ári burynǵy munai magnaty Frenk Monstreidi izdeýge jariialady. Onyń esimi buǵan deiin qashqyn bankir Muhtar Ábliazov tóńiregindegi daýlarda birneshe ret atalǵan bolatyn, dep habarlaidy ult.kz.
Izdeý týraly aqparat Bas prokýratýranyń quqyqtyq statistika portalynda jariialandy. Málimetke sáikes, 61 jastaǵy belgiialyq azamatqa qatysty izdestirý isi 20 mamyr kúni Astanada tirkelgen. Isti Qazaqstan UQK-niń Sybailas jemqorlyqqa qarsy qyzmeti júrgizip jatyr.
Ashyq derekkózderdegi málimet boiynsha, Frenk Monstrei – munai-gaz salasyndaǵy iri investorlardyń biri. Ol 2004 jyly buryn Zhaikmunai ataýymen belgili bolǵan Nostrum Oil & Gas kompaniiasyn satyp alǵan. Keiin kompaniia London qor birjasyna shyǵarylyp, Qazaqstannyń batysyndaǵy munai-gaz jobalaryn igerýmen ainalysqan.
Birqatar halyqaralyq jariialanymda Monstreidiń esimi BTA banki isi jáne Ábliazovpen yqtimal bailanystar aiasynda atalǵan. Málimetterge qaraǵanda, 2017 jyly London Joǵarǵy soty BTA banki talaptarynyń aiasynda Monstreimen bailanysty qurylymdardyń kei aktivterine shekteý qoiǵan.
Al 2018 jyly Organized Crime and Corruption Reporting Project jýrnalisteri júrgizgen zertteýde ofshorlyq kompaniialar arqyly ótken 440 million dollar kólemindegi kúmándi qarjy operatsiialary týraly aitylǵan. Tergeýshiler bul qarajat Monstreige qatysy bolýy múmkin qurylymdar arqyly qozǵalǵanyn málimdegen.
Alaida Frenk Monstrei ózine taǵylǵan kúdikterdi joqqa shyǵarǵan. Ol jýrnalisterge bergen túsiniktemesinde ózin Ábliazovtyń “senimdi adamy” bolmaǵanyn aityp, jaǵdaidy burynǵy biznes qatynastarynan týǵan qarjylyq daýlarmen bailanystyrǵan.
Qazirgi ýaqytta Qazaqstan tarapy belgiialyq kásipkerge qatysty izdestirý aiasynda qandai naqty aiyp taǵylǵanyn resmi túrde jariialaǵan joq.
