Memleket basshysy Nursultan Nazarbaev «Astana Hub» halyqaralyq IT-startaptar tehnoparkiniń jumysyna únemi kóńil bólmek. Bul jaiynda Prezident atalǵan tehnopark jumysyn resmi iske qosý sharasy kezinde málim etti, dep habarlaidy QazAqparat tilshisi.
Kórshiles alpaýyt elder IT-startaptar salasynda ilgeri jyljyp bara jatqanyna toqtalǵan Prezident «Atap aitqanda, bul baǵytta elimiz qalyp qalmaýy kerek. Búgingi tanystyrylym barysynda atalyp ótken málimetter adamdy jigerlendiredi. Sondyqtan osy jumystardy baqylaýda ustaityn bolamyn. Ótken jyly biz 100 jańa esimge engen adamdardy qarsy alǵan bolatynbyz, búginde olardyń arasynda óz armanyn júzege asyrǵandar da bar. Biyl úlken jetistikterge qol jetkizgen Qazaqstannyń 100 nemese 200 jańa esimin anyqtaityn bolamyz», - dedi.
Sonymen qatar QR Prezidenti jańa tehnologiialar salasynda eńbek etip júrgen jastarǵa tabys tiledi.
«Bul saladaǵy mamandardyń barlyǵy - jastar. Qazaqstannyń jarty halqy 30-ǵa tolmaǵan jastar. Bolashaq - sizderdiń qoldaryńyzda. Búgingi básekeles zamanda bizdiń elimiz óz Táýelsizdigin saqtap, aldyńǵy qatarly damyǵan 30 eldiń qatarynda bolýy úshin sizder jaqsylap jumys isteýlerińiz kerek. Tek eńbekpen, bilimmen ǵana osy maqsatqa jetemiz. Sondyqtan bilim berý men ǵylym salasyna jyldan jylǵa qarajatty bólý kólemi artatyn bolady», - dedi Memleket basshysy.
Budan buryn habarlanǵandai, Elbasy Nursultan Nazarbaevtyń qatysýymen «Astana Hub» halyqaralyq IT-startaptar tehnoparkiniń jumysyn resmi iske qosý sharasy ótti.
Saltanatty shara barasynda Prezident 2019 jyldyń 1 qańtarynan Qazaqstanda jańa IT-ýniversitet jumys isteitinin málim etti.
Aita keteiik, Astana Hub missiiasy - el ekonomikasyn nyǵaitý úshin startap-mádenietti damytý jáne joǵary tehnologiialyq jobalardy qoldaý. Aldaǵy ýaqytta tehnopark Qazaqstan innovatsiiasynyń ekojúiesin damytýdyń ózegi ári lokomotivine ainalyp, tehnologiialyq biznesti damytý úshin halyqaralyq deńgeide moiyndalǵan hab bolýy qajet. Jalpy Astana Hub 2022 jylǵa qarai startap-rezidentterdi investitsiialaý kórsetkishin 67 mlrd teńgege jetkizýdi maqsat etip otyr.
