Foto: Almaty ákimdigi
18 tamyzda Almatyda Túrki memleketteri uiymynyń (TMU) IV Halyqaralyq jastar festivaliniń resmi ashylý saltanaty ótti. Is-shara barysynda qalaǵa «2025 jylǵy Túrki áleminiń jastar astanasy» mártebesi berildi, dep habarlaidy Ult.kz.
Festivaldiń saltanatty ashylýyna Qazaqstan Respýblikasynyń Mádeniet jáne aqparat ministri Aida Balaeva qatysyp, Memleket basshysy Qasym-Jomart Toqaevtyń arnaiy quttyqtaý hatyn oqyp berdi.
"Almaty – azattyǵymyzdyń altyn besigi, jasampaz jastardyń qutty mekeni. Órkenietimizdiń órisin keńeitýge ólsheýsiz úles qosqan kóptegen uly tulǵalarymyz osy qalada ósip-óngen. Shyn máninde, tól mádenietimizdiń temirqazyǵyna ainalǵan shejireli shahar qazaq eliniń ǵana emes, túrki memleketteriniń de rýhani ordasy sanalady. Búgin asqaraly Alataýdyń baýraiynda túbi bir túrki jurtynyń bilimpaz, daryndy ári belsendi jastary bas qosyp otyr. Irgeli is-shara aiasynda jańa dostar taýyp, tyń ideialar men jobalardy júzege asyrasyzdar dep senemin. Órenderimizdiń birligi bekem bolsa, túrki áleminiń tuǵyry myǵym, bolashaǵy jarqyn bolary sózsiz. Qazaqstan baýyrlas halyqtardyń igi bastamalaryna únemi qoldaý kórsetip keledi. Biz elderimizdiń arasyndaǵy jan-jaqty yqpaldastyqty nyǵaitýǵa airyqsha mán beremiz. Astanada Dúniejúzilik kóshpendiler oiyndarynyń ótýi, Aqtaýdyń Túrki áleminiń mádeni astanasy jáne Almatynyń Túrki jastarynyń astanasy atanýy – sonyń aiqyn dáleli", – delingen Memleket basshysynyń quttyqtaýynda.
Óz sózinde ministr Aida Balaeva Almatynyń mádeniet pen ǵylymnyń, bilim men innovatsiianyń toǵysqan ortalyǵy ekenin atap ótti. Onyń aitýynsha, qala búginde túrki áleminiń jas kóshbasshylary men shyǵarmashyl ókilderi úshin jańa ideialar men seriktestiktiń ordasyna ainalýda.
Saltanatty sharaǵa arnaiy qatysqan TMU bas hatshysy Kýbanychbek Omýraliev:
"Búgin biz Túrki áleminiń jastar astanasy ataǵyn Lenkoran qalasynan qarqyndy damyp kele jatqan Almaty qalasyna tabystaý sátiniń kýási bolyp otyrmyz. Bul qadam – ortaq qundylyqtarymyzdyń sabaqtastyǵyn, sondai-aq bolashaq Túrki álemin qalyptastyrýdaǵy jastardyń ósip kele jatqan rólin aiqyn kórsetedi. Ózderińiz biletindei, Almaty qalasyna bul mártebe Túrki memleketteri uiymyna múshe elderdiń Jastar jáne sport ministrleriniń 8-shi otyrysynyń sheshimi negizinde berilgen bolatyn. Qalanyń zamanaýi mádeni ómiri, belsendi bilim berý mekemeleri jáne yntaly jastary – Túrki áleminiń jańa býynynyń rýhy men áleýetiniń aiqyn kórinisi" - dep atap ótti.
Almaty qalasynyń ákimi Darhan Satybaldy qala jastarynyń lebizimen bólisip:
"Almaty – túrki elderiniń jastary bas qosatyn, ortaq murattar toǵysatyn, mádenietimiz ben dástúrimiz jańǵyratyn úlken ortaǵa ainalýda. Bul mártebe – tek ataq emes, bolashaqqa degen ýáde. Túrki jastarynyń daýysy osy Almatydan estilip, ideialary bastaý alyp, dostyǵy osy shaharda bekisin! Almaty – bizdiń ortaq úiimiz, túrki jastarynyń shamshyraǵy, bolashaqtyń ortalyǵy!" - dedi.
Foto: Almaty ákimdigi
Saltanatty is-shara aiasynda baýyrlastyqtyń, senim men jańa múmkindikterdiń nyshanyna ainalǵan jastar astanasy kiltin 2024 jylǵy jastar astanasy - Lenkoran qalasy, Ázerbaijan eliniń ókilderi Almaty jastaryna tabystap, baýyrlastyq estafetasyn jalǵady.
Aita keteiik, halyqaralyq festival QR Mádeniet jáne aqparat ministrliginiń jáne Almaty qalasy ákimdiginiń qoldaýymen ótip jatyr.
Abai alańynda uiymdastyrylǵan saltanatty is-sharada Almaty turǵyndary men qonaqtaryna estrada juldyzdary men shyǵarmashylyq ujymdardyń qatysýymen keń kólemdi kontsert usynyldy.
Festival 19 tamyzda da jalǵasady. Túrki memleketteri uiymyna múshe elder – Qazaqstan, Ázerbaijan, Qyrǵyzstan, Túrkiia jáne Ózbekstannan kelgen delegattar jastar saiasaty, kásipkerlik, azamattyq belsendilik jáne áleýmettik bastamalardy damytý tájiribelerimen bólisedi. Sondai-aq jas kóshbasshylar men kásipkerlerdiń kezdesýi ótedi.
