2019 jyly «Eir Astana» FlyArystan qoljetimdi áýe kompaniiasyn iske qosady, dep habarlaidy QazAqparat tilshisi.
Jańa áýe kompaniiasy Easyjet, Indigo, Cebu Pacific, Air Asia halyqaralyq loýkosterleriniń úlgisi boiynsha arzan modelde jumys isteitin bolady.
Eske sala ketsek, 2 qarashada Memleket basshysy Investitsiialar jáne damý ministri Jeńis Qasymbekti, «Samuryq-Qazyna» aktsionerlik qoǵamy direktorlar keńesiniń múshesi Richard Evansty jáne «Eir Astana» áýe kompaniiasynyń prezidenti Piter Fosterdi qabyldaǵan bolatyn. Kezdesý sońynda Memleket basshysy «Eir Astana» bazasynda biýdjettik áýe kompaniiasyn qurýdy tapsyrdy.
Áýe kompaniiasy ókilderiniń aitýynsha, FlyArystan qazirgi tarifterden eki ese arzan turatyn áýe biletterin usynady. Áýe kompaniiasy jolaýshylardy 180 orynǵa arnalǵan Airbus A320 ushaǵymen tasymaldaityn bolady.
Alǵashqy ýaqytty qazaqstandyq loýkoster 4 ushaqty paidalanady. 2022 jyly olardyń sany 15 ushaqqa deiin artady.
«Biýdjettik áýe kompaniiasy Qazaqstannyń qalyń buqarasyna arnalǵan. Biz óńirlerdegi qarapaiym turǵyndardyń ushaqpen ushqanyn qalaimyz. Bul - bizdiń missiiamyz. Siz ózińizge kez kelgen áýe kompaniiasyn tańdai alasyz. Eger jolaýshynyń júgi bolmasa, ol loýkosterdi paidalana alady. Jańa tasymaldaýshy barlyq halyqaralyq qaýipsizdik talaptaryna sai bolady», - dedi «Eir Astana» AQ prezidenti Piter Foster.
Sondai-aq, Air Astana prezidenti jańa áýe kompaniiasynyń basshysy Tim Djordandy tanystyrdy. Ol Cebu Pacific jáne Virgin Blue siiaqty biýdjettik áýe kompaniialarynda 15 jyl boiy jumys istegen.
Onyń aitýynsha, jańa kompaniia aktsionerlerdiń investitsiialaryn, memlekettik sýbsidiialardy nemese syrtqy qarjy qoldaýyn jumyldyrmaidy.
«Air Astana-da ushqyshtar daiyndaý joǵary halyqaralyq deńgeide, bizde de sondai bolady. Biz sondai deńgeidi ustap turamyz», - dedi FlyArystan ushý óndirisi departamentiniń jetekshisi Berdihan Agmýrov.
FlyArystan 2019 jyldyń kókteminen ushýdy bastaýdy josparlap otyr. Áýe kompaniiasy Qazaqstannyń birneshe qalasyna reis jasamaq.
«Ushý kestesi men baǵyttar jiiligi 2019 jyldyń naýryz aiynyń basynda belgili bolady. Kez kelgen azamat naýryzdyń basynda biletterdi brondai alady. Bolashaqta biz Qazaqstannyń barlyq áýejailaryn qamtimyz. Bizde Almaty-Aqtaý eń uzaq marshrýt bolyp otyr. Onyń ushý ýaqyty 3,5 saǵatqa sozylady. FlyArystan ushaqtary jolda janarmai quiý úshin toqtamai-aq, tikelei reis jasai alady», - dedi AirArystan áýe kompaniiasynyń josparlaý jónindegi direktory Rafael Taijanov.
Aita ketsek, QR Investitsiialar jáne damý ministri Jeńis Qasymbek jańa biýdjettik kompaniianyń ortasha baǵasy shamamen 16-18 myń teńge aralyǵynda bolatynyn atap ótken bolatyn. Bilet quny tek oryn úshin alynady. Júk pen tamaqtyń aqysyn bólek tóleýge bolady. Sonyń esesinen ishki reisterdiń baǵasy biraz arzandai túspek.
