Foto: Primeminister.kz
Úkimet Memleket basshysy Qasym-Jomart Toqaevtyń tapsyrmasyn oryndaý maqsatynda nashaqorlyq profilaktikasy jáne esirtki qylmysyna qarsy is-qimyl boiynsha memlekettik organdardyń qyzmetin úilestiretin respýblikalyq shtab qurdy, dep habarlaidy Ult.kz.
Premer-ministrdiń ókimimen qurylǵan shtabqa Úkimet basshysy jetekshilik etedi. Onyń orynbasarlary retinde Premer-ministrdiń orynbasary jáne Ishki ister ministri belgilendi.
Shtabtyń negizgi mindetteri — memlekettik organdardyń nashaqorlyqqa jáne esirtki biznesine qarsy is-qimylyn úilestirý, aldyn alý sharalarynyń tiimdi tásilderin ázirleý, sondai-aq esirtkige táýeldi azamattardy profilaktika, emdeý jáne ońaltý júiesin jetildirý.
Quramyna Bas prokýratýra, Ulttyq qaýipsizdik komiteti, Qarjy monitoringi agenttigi, Ulttyq bank, Qarjy naryǵyn retteý jáne damytý agenttigi jáne jaýapty ministrlikterdiń ókilderi kirdi.
Sonymen qatar, Premer-ministrdiń ókimine sáikes elimizdiń barlyq óńirinde, sondai-aq Astana, Almaty jáne Shymkent qalalarynda óńirlik shtabtar qurylady.
