Memlekettik organdarda destrýktivti dini aǵymdardyń ókilderi baiqalǵan joq. Bul týraly búgin Parlament Májilisindegi Úkimet saǵatynynan keiin QR Din isteri jáne azamattyq qoǵam ministri Nurlan Ermekbaev málim etti, dep habarlaidy QazAqparat.
«Destrýktivti túrli dini aǵymdardyń ókilderine toqtalatyn bolsaq, olar elimizde bar jáne osy adamdarmen tiisti túsindirý jumystary júrip jatyr. Bul olardyń jeke ózderiniń jańylysýy, sondai-aq dindi durys túsinbeýdiń sipaty. Alaida osy adamdardyń memlekettik organdarda qyzmet etýi jaiynda bilmeimin. Meniń oiymsha, memorgandarda osyndai adamdar joq», - dedi ministr tilshiler saýalyna jaýap berý kezinde.
Májilistegi Úkimet saǵaty barysynda N. Ermekbaev Konstitýtsiia men zańdar boiynsha barlyq dinder teń bolyp otyrǵanyn, birde bir din ózge dinder aldynda artyqshylyqqa ie emes ekenin eske salyp ótti.
«Búgingi kúni dini birlestiktermen birge eńseretin birqatar syn-qaterler tur. Birinshiden, sońǵy jyldary azamattar dinshildiginiń jyldam ósýi - dini mádeniettiń durys qalyptasýynan jáne dini dogmalardy syni qabyldaýdan ozyp ketti. Keibir dinshil adamdar dini qaǵidalardy sózbe-sóz buljytpai oryndap, zańdar men zaiyrly ǵibrattarynan joǵary orynǵa qoiyp otyr. Bul otbasyndaǵy, sondai-aq jalpy memlekettik kúrdeli syn-qaterlerdiń, shielenisterdiń shyǵý kózi», - deidi N.Ermekbaev.
Budan bólek ol elimizdiń dini aýditoriiasyna syrtqy teris yqpaldar kúsheigenin sóz etti. Buǵan aqparattyq keńistiktiń ashyqtyǵy jáne jahandaný protsesteri yqpal etýde. Internet, áleýmettik jeliler men basqa da kommýnikatsiialyq quraldar turǵyndar sanasyna jappai ideologiialyq áser etýge múmkindik beredi.
