QR Parlamenti Senatyndaǵy Úkimet saǵatynda Bilim jáne ǵylym ministriniń orynbasary Elmira Sýhanberdieva elimizdegi apatty jáne úsh aýysymdy mektepterdiń máselesi qalai sheshiletinin málim etti, dep habarlaidy Baq.kz agenttigi.
Vitse-ministr bilim salasyndaǵy ózekti problemalardyń biri – apatty jáne úsh aýysymdy mektepter ekenin moiyndady.
«Apatty mektepterdiń qatarynda paidalaný merzimi aiaqtalyp kele jatqan bilim ordalary qosylýda. Elimizdegi 82% mektep 1991 jylǵa deiin, al 34% mektep 1971 jylǵa deiin turǵyzylǵan. Úsh aýysymdy mektepterdiń problemasy ekonomikalyq, demografiialyq jáne migratsiialyq protsesterge bailanysty bolyp otyr», - dedi ol.
Osy oraida Elmira Sýhanberdieva atalǵan máseleni sheshý úshin elimizde jyl saiyn 100-den astam mektep salynatyn jetkizdi.
«Biyl 53 mlrd teńgege 108 mektep salynyp jatyr. 3 jyldyq biýdjette 97 mlrd teńgege 73 jańa mekteptiń qurylysy qoldaý tapty. Onyń ishinde 50 mlrd teńgege 34 mektep bar. Úsh aýysymdy mektep máselesin sheshý úshin 33 mektep salynýda. Taǵy 30 mektep aldaǵy 3 jylda salynady. Onyń 19-y bólingen 50 mlrd teńgege salynady. Olardyń qurylysy respýblikalyq biýdjet esebinen qarjylandyrylady 41 mektepti jergilikti organdar turǵyzady. Al 9 mektepti jeke-menshik investorlardyń kómegimen salamyz dep josparladyq», - dedi ministrdiń orynbasary.
Sýhanberdievanyń aitýynsha, apatty mektepterdiń ornyna 13 obekti salynady.
«Onyń altaýy jaqyn jyldary, qalǵan beseýi respýblikalyq biýdjetten bólinetin 50 mlrd teńgege salynady. 12 mektepti jerigilikti organdar turǵyzady. Osylaisha, atalǵan másele tolyǵymen sheshiledi», - dep túiindedi sózin vitse-ministr.
Esterińizde bolsa, vitse-ministr muǵalim mártebesi týraly zańdy daiyndaýǵa kirisip ketkendikterin aitqan bolatyn. Sonymen qatar, biylǵy jyly qansha ustazdyń jalaqysy kóterilgeni týraly da aitqan edi. Al elimizde qansha ustazdyń qansha pándi aǵylshyn tilinde oqytyp júrgenin de vitse-ministr tilge tiek etken bolatyn. Sondai-aq, vitse-ministr aldaǵy jyly 1-synyptan bastap imformatika páni oqytylatynyn aitty. Budan bólek Elmira Sýhanberdieva mektepte "Ólketaný" kýrsy oqytylatynyn jetkizdi.
