Foto: Optimism.kz
Qazaqstan Respýblikasynyń Mádeniet jáne aqparat ministri Aida Balaeva elimizdiń barlyq mádeniet jáne óner salasy qyzmetkerlerin kásibi merekesimen shyn júrekten quttyqtady, dep habarlaidy Ult.kz.
Ministr óziniń quttyqtaýynda Qazaqstannyń mádeniet salasynda atqarylyp jatqan ister men jetistikterdi, sondai-aq aldaǵy josparlardy atap ótti.
«Qazaqstanda 7 600 mádeniet mekemesi jumys isteidi. Bul qatarǵa 3 890 kitaphana, 57 teatr, 231 arhiv, 275 mýzei, 2 994 mádeni-demalys ortalyǵy, 113 kinoteatr, 36 kontserttik uiym jáne 4 tsirk kiredi. Salada 58 myńnan astam maman qyzmet atqarady. Mádeniet – bul eldiń rýhani jáne tarihi murasyn saqtaýdyń, ony halyqaralyq deńgeide tanystyrýdyń mańyzdy quraly», – dedi ministr.
Mádeni muranyń halyqaralyq deńgeide tanylýy
Ministrdiń aitýynsha, Qazaq Culture aqparattyq platformasynyń iske qosylýy – mádeniet salasyndaǵy eń mańyzdy bastamalardyń biri. Bul platforma Qazaqstannyń mádenieti men ulttyq bolmysyn segiz tilde tanystyrady, onyń ishinde qazaq jáne túrik tilderimen qatar, BUU-nyń resmi alty tili qamtylǵan.
Sonymen qatar, 2024 jyly toǵyz respýblikalyq uiymǵa «Ulttyq» mártebe berilýi olardyń qyzmetkerleriniń eńbekaqysyn 1,75 esege arttyrýǵa múmkindik jasady. Qazaqstan halyqaralyq mádeni jobalarǵa belsendi qatysyp keledi. Mysaly, 60-shy Venetsiia biennalesinde Qazaqstan pavilony ashylyp, onda otandyq sýretshilerdiń týyndylary qoiyldy. Frantsiiadaǵy Gime mýzeiinde «Qazaqstan: Uly dala jaýharlary» atty kórme ótti, al Qytaida «Altyn adam jáne Uly dala» kórmesi uiymdastyryldy.
Halyqaralyq mádeni bailanystardy nyǵaitý
Qazaqstannyń mádeniet kúnderi shetelde belsendi túrde ótkizilýde. 2024 jyly Tájikstan men Túrikmenstanda Qazaqstannyń mádeniet kúnderi ótse, Ashhabadta Qurmanǵazy men Abaiǵa arnalǵan eskertkishter ornatyldy. Sondai-aq, Qazaqstanda Túrikmenstan, Ázerbaijan, Armeniia jáne Saha Respýblikasynyń mádeniet kúnderi ótkizildi.
Elimizdiń jas talanttarynyń jetistikteri
Ministr atap ótkendei, elimizdiń jas ónerpazdary da ulttyq imidjdi nyǵaitýǵa zor úles qosýda. 255 qazaqstandyq ónerpaz 17 memlekette ótken halyqaralyq baiqaýlarda jeńimpaz atandy. «Qazaqkontsert» birlestigi janynan Memlekettik klassikalyq gitarister kvinteti men «Birlik» ansambli quryldy.
Tarihi-mádeni murany saqtaý
Tarihi-mádeni murany saqtaý men nasihattaý jumystary jalǵasýda. 2024 jyly «Betashar» dástúri IýNESKO-nyń materialdyq emes mádeni muralar tizimine endi. Sonymen qatar, Qazaqstan IýNESKO-ǵa «Jibek joly: Ferǵana – Syrdariia dálizi» jáne «Mańǵystaýdyń jerasty meshitteri» jobalary boiynsha nominatsiialyq doseler tapsyrdy.
Kino jáne teatr salasynyń jetistikteri
2024 jyly memleket qoldaýymen 16 ulttyq film túsirildi, onyń ishinde 7 film halyqaralyq deńgeide 34 marapatqa ie boldy. Teatrlarda 300-den astam jańa qoiylym sahnalandy. Aldaǵy ýaqytta kinoprokat salasyna arnalǵan «E-Kino» aqparattyq júiesi engizilmek.
Bolashaqqa josparlar
2025 jyly elimizde Uly Otan soǵysyndaǵy Jeńistiń 80 jyldyǵyna arnalǵan 2000-nan astam is-shara, Abaidyń 180 jyldyǵy men Qazaqstan Konstitýtsiiasynyń 30 jyldyǵyna orai túrli mádeni jobalar júzege asyrylmaq. Sonymen qatar, 51 mádeniet nysanyn jóndeý jáne 250 jańa nysan salý josparlanyp otyr.
Aida Balaeva mádeniet qyzmetkerlerine shyǵarmashylyq shabyt, tolaiym tabys jáne halyqtyń ystyq yqylasyn tiledi.
