Abaidyń «Jidebai-Bórili» Memlekettik qoryq-mýzeiiniń direktory Jandos Áýbákir uly aqynnyń 175 jyldyq mereitoiyna bólinetin qomaqty qarajattyń qaida jumsalatynyn aitty, dep habarlaidy "Ult aqparat"..
«Abaidyń 175 jyldyq mereitoiyna arnalǵan sharalarǵa qomaqty qarjy bólinip otyr. Bul osy jyly eldigimiz ben rýhaniiatymyz úshin asa mańyzdy shara ári memlekettik qana emes, halyqaralyq deńgeide atqarylatyn zor mindet. Biyl osy mereitoi aiasynda josparlanyp otyrǵan qarajat iri halyqaralyq jáne respýblikalyq qoǵamdyq mańyzy bar ǵylymi, aǵartýshylyq is-sharalarǵa, Abai murasyn nasihattaýǵa baǵyttalǵan kórmelerge, jalpy aqyn ómirinen syr shertetin qundy jádigerlerdi saqtap otyrǵan mýzei salasyna jumsalatyn bolady», - dedi ol.
Mýzei direktorynyń aitýynsha, mereitoi aiasynda Abaidyń qasterli mekeni – áigili Jidebaidy abattandyrý, uly aqynnyń rýhyna taǵzym etýge keletin jurtshylyqqa qolaily jaǵdai jasaý kózdelgen.
«Sonymen qatar Prezident Qasym-Jomart Toqaev «Abai jáne HHI ǵasyrdaǵy Qazaqstan» maqalasynda atap ótkendei, Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-mýzeiin ǵylymi-tanymdyq jumystarmen ainalysatyn ortalyqqa ainaldyrý josparlanyp otyr. Bir sózben aitqanda bul toi Uly aqyn Abaidyń rýhyna taǵzym etip, murasyn dáriptep, barsha álem jurtshylyǵyna Abaidy tanytý, qazaq eliniń mádenieti men rýhaniiatyn pash etý úshin ótkizilmek», - dedi Jandos Áýbákir.
