Sońǵy jyldary mektepterdegi túrli qoshtasý keshteri qoǵamda qyzý talqylanyp júr. Ásirese ata-analar balabaqshamen, Álippemen, bastaýysh synyppen, 9 jáne 11-synyppen qoshtasý sharalarynyń shekten tys dańǵazaǵa ainalyp ketkenine narazy, dep habarlaidy ult.kz.
Jeli qoldanýshylarynyń aitýynsha, mundai merekeler úlken qarjylyq shyǵynǵa ákelip jatyr. Qymbat kiim, sándi shash úlgisi, makiiaj, manikiýr, muǵalimderge syilyq, fotosessiia, meiramhana jaldaý – munyń bári ata-analardyń qaltasyna aitarlyqtai salmaq túsiredi. Keibir oqýshylardyń ata-anasynan 101 gúl suratqany týraly pikirler de áleýmettik jelide talqyǵa túsken.
Kópshilik mundai básekeniń balalar arasynda orynsyz túsinik qalyptastyratynyn aitady. Olardyń pikirinshe, mektep bitirý keshteri bilim men tárbieden góri sán-saltanat jarysyna ainalyp barady.
«Qarapaiym mektep bitirýdiń ózi úlken toi sekildi ótip jatyr. Ata-analar bara-bara shyǵynǵa batyp barady. Mundai sharalarǵa shekteý qoiý kerek», – dep jazdy jeli qoldanýshylarynyń biri.
Sondai-aq jurt bilim basqarmalary men mektep direktorlaryn osy máselege nazar aýdarýǵa shaqyryp otyr. Olardyń aitýynsha, mektep ákimshiligi artyq shyǵyndy talap etetin bastamalarǵa naqty shekteý qoisa, ata-analar da qysym kórmes edi.
Jelide bul másele boiynsha pikir ekige bólingen. Biri buǵan ata-analardyń ózin kinálasa, endi biri ministrliktiń aralasýyn suraidy.
