13 қар, 2019 сағат 13:48

БҚО-да Ресей азаматы 242 млн теңгенің киік мүйізімен ұсталды

Батыс Қазақстан облысында ресейлік азамат 29 келі киік мүйізімен қолға түсті, деп хабарлайды "Ұлт ақпарат".

ҚР Ұлттық қауіпсіздік комитеті Шекара қызметі «Батыс» өңірлік басқармасы 2029-әскери бөлімінің әскери қызметшісі, капитан Азамат Бимановтың айтуынша, заңды бұзған азамат бүгін, таңғы сағат 06.00-де Ақсай автомобиль өткізу бекетінде ұсталды.

«Шекаралық бақылауды жүзеге асыру кезінде ресейлік азамат тізгіндеген автокөліктің жүксалғышындағы жол сөмкесінен киіктің жаңадан кесілген 128 дана мүйізі табылды. Мүйіздің жалпы салмағы 28 кг 914 грамды құрады. Құны 242,4 млн теңгеге бағаланды», - делінген таратылған хабарламада.

Аталған азамат Қазақстаннан Ресейге бара жатқан.

БҚО Полиция департаментінің баспасөз қызметі осы оқиғаға байланысты ҚР ҚК-нің 339-бабына сәйкес қылмыстық іс қозғалып, Бөрлі ауданы полиция бөлімі тергеу амалдарын бастағанын жеткізді.