Фото: gov.kz
Шоқан Уәлиханов атындағы жекеменшік мектеп Алматы қаласындағы жалпы білім беретін мектептердің 1–4-сынып оқушылары арасында экологиялық байқау ұйымдастырды. Бұл байқау «Жасыл болашақ» эко-фестивалі аясында өткізілді және оқушылардың экологиялық сауаттылығын арттыруға, шығармашылық қабілеттерін дамытуға және табиғатқа жауапкершілікпен қарауды қалыптастыруға бағытталды, деп хабарлайды Ult.kz.
Байқау екі кезеңнен тұрды. Бірінші — іріктеу кезеңі — қашықтықтан өтті: қатысушылар 2025 жылғы 26 мамырға дейін өз жұмыстарын jasylbolashaq.kz сайтына жүктеді. 80-нен астам финалист 30 мамырда — Халықаралық балаларды қорғау күнінде — Ш. Уәлиханов атындағы жекеменшік мектеп аумағында (Самал-3 ықшам ауданы, 37/1 үй) өткен көрмеге және марапаттау рәсіміне шақырылды.
Байқауға 3–6 оқушыдан тұратын топтар қатысты. Олар экологиялық мәселелер және оларды шешу жолдары тақырыбында плакат әзірледі. Жұмыстар бес критерий бойынша бағаланды: тақырыпқа сәйкестік, идеяның ерекшелігі, көркемдік деңгейі, ұжымдық еңбек және ұсынылған шешімнің практикалық маңыздылығы. Финалистер дипломдар мен бағалы сыйлықтарға ие болды, ал барлық қатысушыларға электронды сертификаттар табысталды.
Сонымен қатар, балалар экологиялық мәселелерді шешуге бағытталған шеберлік сабақтарына, ойындарға және эстафеталарға белсенді қатысты.
«Біз балаларға білім беріп қана қоймай, табиғатқа және ел болашағына жауапкершілік сезімін де қалыптастыруға тырысамыз. Экологиялық байқау — жас алматылықтардың бастама көтеруіне, топпен жұмыс істеуіне және экологиялық мәселелерге шығармашылық тұрғыда көзқарас білдіруіне мүмкіндік береді», — деді мектептің негізін қалаушы Әсел Тасмағамбетова.
Жоба «Жасыл Қазақстан» мемлекеттік тұжырымдамасын қолдай отырып жүзеге асырылуда және қаламыздағы бастауыш сынып оқушыларының экологиялық мәдениетін дамытуға бағытталған. Ең үздік жұмыстар ресми сайтта және Jasyl Bolashaq мобильді қосымшасында жарияланады.
