Фото: Pexels.com
Жамбыл облысы, Шу аудандық орталық ауруханасындағы ана мен бала өлімінен кейін жауаптылар жазаланды, деп хабарлайды Ult.kz.
Арнайы комиссия «Жүкті әйел дәрігерлердің қателігінен қайтыс болды» деген қорытынды шығарған. Аудандық аурухананың бас дәрігері мен босандыру бөлімінің басшысы қызметінен босатылды. Ал облыстық басқарма басшысы және ана мен бала денсаулығын қорғау бөлімінің басшысына қатаң сөгіс берілді.
Мамандар марқұм Әдемі Ешеналиеваның ісік дәрежесін бағамдамай, зәр мөлшерінің шамадан тыс төмендегенін назарға алмаған. Салдарынан жүкті келіншектің қан қысымы 170-ке жетіп, есін жоғалтқан. Сол сәтте құрсақтағы баласы шетінеп кеткен. Өзі де 12 күн жансақтау бөлімінде жатып қаза болды.
"Дәрігерлер оны тексеріп, консилиюм жасап, III дәрежеге облыстық перенеталдық орталыққа жіберу керек еді. Ол бірінші дәрежеде қалып қойған. Біздің облыстық комиссияның жұмысы аяқталды. Енді әрі қарай біздің министрлік осы мәселені қарайды", - деді облыстық Денсаулық сақтау басқармасы басшысы орынбасарының міндетін атқарушы Қаракөз Сағынғалиева.
Осы қайғылы оқиғаға байланысты Жамбыл облысының өңірлік денсаулық сақтау саласының мамандары арнайы кеңес өткізді. Кеңеске облыс әкімінің орынбасары Серік Сәлемов төрағалық етіп, денсаулық сақтау басқармасының өкілдері, жетекші медициналық мамандар, жергілікті ауруханалар мен емханалардың бас дәрігерлері қатысты.
Жиында облыстық денсаулық сақтау басқармасы басшысының міндетін атқарушы Ерік Мұсабаев өңірдегі ана мен бала өліміне қатысты ресми мәліметтерді ұсынып, жалпы ахуалды баяндады. Сонымен қатар, Шу қаласында орын алған жағдай бойынша жұмыс жүргізген комиссия мүшелері де алдын ала қорытындыларын таныстырды.
Кеңес барысында Шу қалалық емханасының бас дәрігерінің міндетін атқарушы Гаухар Инкарбекова медициналық мекеменің атқарған жұмыстары мен науқасқа көрсетілген көмек барысын баяндады. Ал Шу көпбейінді аудандық орталық ауруханасының бас дәрігері Қуаныш Төлепбергенов аурухана деңгейінде ана мен бала денсаулығын сақтау бағытында жасалып жатқан шаралар мен туындаған қиындықтар туралы ақпарат берді.
Қазіргі уақытта аталған жағдайға байланысты тексеріс жұмыстары жалғасуда. Арнайы комиссия оқиғаның барлық мән-жайын анықтап, қорытынды шешім қабылдайтын болады.
555 рет оқылды
