01 нау, 2021 сағат 12:44

Қызылордада үйі өртеніп, нәрестесі көз жұмған отбасына үй берілді

Қызылордада үйі өртеніп, нәрестесі қаза болған Текебаевтар отбасына жаңа баспана берілді, деп хабарлайды "Ұлт ақпарат".

Естеріңізге сала кетелік , оқиға биылғы жылдың 18 ақпанында облыс орталығындағы Әл-Фараби мөлтек ауданында болды.

Оқиға орнына шұғыл жеткен өрт сөндіру бөлімінен 3 техника мен 16 қызметкер күшімен жалын толық өшірілді. Оқиға салдарынан 2020 жылы дүниеге келген нәресте көз жұмды.

Балалардың анасы, 1993 жылғы әйел бірінші дәрежелі көмір қышқыл газына улану және сол жақ білектің және екі алақанының термиялық күйік шалу нақтамасымен қалалық ауруханаға жатқызылды. Бүгінгі күні жағдайы бірқалыпты.

Қорлардың бастамасымен халықтан жиналған қаржыға өрт салдарынан зардап шеккен Текебаевтар отбасына Арай мөлтек ауданынан 6 бөлмелі жаңа жер үй берілді.

Зардап шеккен көпбалалы отбасы әкімдік тарапынан, кәсіпкерлердің қолдауымен 1 айға жететін азық-түлік, мектеп құрал-жабдығымен қамтамасыз етілді.

Бүгін облыс әкімі Гүлшара Әбдіқалықова өрт салдарынан нәрестесі қаза болған Текебаевтар отбасына барып, көңіл айтты.

Аймақ басшысы үй иелерін жаңа баспанамен құттықтап, тұрмысқа қажетті сыйлықтар табыс етті.