05 мау, 2024 сағат 15:28

Елордада «АФМ online» конференциясы өтті

Сурет: ҚР ҚМА Баспасөз қызметі

Елордада Қаржылық мониторинг агенттігінің қолдауымен өткен «АФМ online» конференциясы қаржы пирамидаларын тану, дроптарға қарсы тұру, халықтың қаржылық сауаттылығын арттыру және басқа да өзекті мәселелерге арналды. Іс-шараның мақсаты - жастардың қаржылық сауаттылығын арттыру және блогосферада дұрыс құқықтық ақпараттық цифрлық мәдениетті қалыптастыру, деп хабарлайды "Ұлт ақпарат" ҚР ҚМА Баспасөз қызметіне сілтеме жасап.

Онлайн пікірталасқа еліміздің 35 жоғары оқу орнынан 20 мыңнан астам студент қатысты. Кездесу барысында спикерлер блогерлермен қызықты кейстерін бөлісіп, аудиториясына маңызды ақпарат жеткізді. Медиа тұлғалар үшін әлеуметтік желілердегі мінез-құлық ережелері және заңмен қарастырылған жарнамалар түсіндірілді.

Панельдік сессиялар барысында белгілі блогерлер, қаржы аналитиктері, қоғам қайраткерлері, депутаттар мен мемлекеттік органдардың өкілдері интернет-гигиена, алаяқтық жобаларды жарнамалағаны үшін жауапкершілік, әлеуметтік желілерде құқыққа қарсы контентті тарату, жастарды құқыққа қарсы қызметке тарту туралы пікір таласты.

Агенттік Төрағасы Дмитрий Малахов құттықтау сөзінде ҚМА-ның негізгі міндеті – жас ұрпаққа қаржылық сауаттылық негіздерін түсіндіру екенін атап өтті.

«2021 жылдан бастап біз қаржы пирамидаларының өмірлік циклін және олардың салымшыларының санын қысқартуға бағытталған арнайы жоба жүргізіп келеміз. Яғни, біз олардың жұмысын бастапқы кезеңінде, халық арасына тарамай тұрып, тоқтату үшін жұмыс істеп жатырмыз», - деді Д.Малахов.

Бүгінгі таңда Агенттік интернетте заңсыз мазмұнды контентті іздеуді және бұғаттауды автоматтандырды. Қазірдің өзінде 10 мыңға жуық сайттар мен қаржы пирамидаларының белгілері бар аккаунттар бұғатталған. Сондай-ақ, алаяқтық схемаларға тартылған салымшыларды ерте анықтау жүйесі жолға қойылған. Қабылданған шаралардың нәтижесінде бүгінгі таңда 126 мың жазылушы алаяқтық схемаларды жарнамалайтын аккаунттардан бас тартты.

Іс-шара барысында ЖОО студенттері үшін әртүрлі алаяқтық схемалардың алдын алуға бағытталған үздік бейнероликке конкурс жарияланды.