16 сәу, 2021 сағат 12:36

Алматыда крематорий қашан іске қосылатыны белгілі болды

Мегаполистегі крематорийдің құрылысы 2021 жылдың қыркүйегінде аяқталады. Бұл туралы онлайн брифинг барысында Алматы қаласы жайлы қалалық орта басқармасының басшысы Сапар Нұрашев айтты, деп хабарлайды "Ұлт ақпарат".

Сапар Нұрашевтың сөзінше, салынып жатқан крематорийде мәйіт қана емес, сонымен қатар аса қауіпті биологиялық қалдықтарды да өртейді. Пандемия кезінде қолданылған медициналық заттар көбейген. Атап айтар болсақ, медициналық маскалар, костюмдер, таңғыштар, шприцтер, ПТР анализін алуға арналған құралдар және тағы басқалары. 

«Қолданылған медициналық қалдықтарды арнайы пештерге жағу арқылы жоюға болады. Осыған байланысты патоанатомиялық бюрода крематорий салу туралы шешім қабылданды»,- деді ол.

Келісімшартқа сәйкес, крематорий Алматы қаласы Алатау ауданы Ақын Сара көшесінің солтүстігінде, ЖЭО-2 шығысына қарай орналасқан патологоанатомиялық бюро жанынан (сыртқы инженерлік желілерсіз) салынады.

Құрылыстың аяқталу мерзімі - 2021 жылдың қыркүйек айы.

Құрылыс құны - 1,3 млрд теңге.