Абай шығармалары әлемнің 30 тіліне аударылады

Қазақтың ұлы ақыны Абай шығармалары әлемнің 30 тіліне аударылады, деп хабарлайды ҚазАқпарат.

ҚР Сыртқы істер министрлігі баспасөз қызметінің мәліметінше, Абай Құнанбайұлының шығармалары әлемнің 30 тіліне аударылады. Мұнан бөлек, Ресей Федерациясында қолданыс аясы кең 10 тілге Абайдың «Қара сөздері» мен өлеңдері атақты жазушылар мен аудармашылардың қатысуымен іждаһатпен аударылып, Ресей баспаларында басып шығару жоспарланған.

«Елшіліктер М.Әуезовтың «Абай жолы» романын араб, түрік, грек, армян, моңғол, вьетнам тілдеріне аударуға атсалысуға дайын. Кембридж университетінің баспасында Британдық кеңеспен бірлесіп, Абайдың өлеңдері мен қара сөздері кіретін жинақты ағылшын және қазақ тілдерінде басып шығарылады«, - деп атап өтеді ведомстводан.

Мұнан бөлек, еліміздің Сыртқы істер министрлігі ҚР Тұңғыш Президенті – Елбасы кітапханасымен және Ұлттық аударма бюросымен бірлесіп, шет тілдерде жарық көрген Абай шығармаларының тұсаукесерін Германия, Бельгия, Люксембург, Қытай, Түркия, Біріккен Араб Әмірліктерінде өтетін халықаралық кітап көрмелерінде өткізбек.

Естеріңізге сала кетсек, таяуда Ақордада Мемлекеттік хатшы Қырымбек Көшербаевтың төрағалығымен Абайдың 175 жылдық мерейтойын дайындау және өткізу жөніндегі мемлекеттік комиссия отырысы өткен болатын. Сол жиында 2020 жылдың 8 қаңтарында елордадағы «Қазақстан» орталық концерт залында Хакім Абайдың 175 жылдық мерейтойының басталуына арналған салтанатты шара өтетіндігі белгілі болған еді.