© Photo : Детский омбудсмен Динара Закиева
Өткен демалыс күндері балалар омбудсмені Динара Зәкиева Алматы облысындағы И. Нүсіпбаев атындағы мектеп-интернатта болды, деп хабарлайды Ult.kz Sputnik Қазақстанға сілтеме жасап.
Оның айтуынша 6 жастан асқан 170 бала интернатта ауыр жағдайда өмір сүріп жатыр.
"Үш жыл бұрын мекемеде күрделі жөндеу жұмыстары басталғанымен, мердігер оны аяқтамай, жосықсыз деп танылды. Соның салдарынан балалар жартылай қираған ғимаратта тұруға мәжбүр, оқу корпусында түнеп, спортзалда тамақтанады, ал санитарлық-гигиеналық нормалар бұзылып отыр", - деп жазды Зәкиева желідегі парақшасында.
Ол бұл мәселені Алматы облысының әкімі Марат Сұлтанғазиевпен кездесу барысында талқылаған.
"Әкімдік жөндеу жұмыстарын аяқтау немесе жаңа интернат салу мәселесін қарастырған. Алайда балалардың қазіргі қиын жағдайында қалмауы үшін оларды жақында жөндеуден өткен және бос орындары бар басқа интернатқа көшіру туралы шешім қабылданды", - деп толықтырды балалар омбудсмені.
Сондай-ақ кездесуде Психологиялық қолдау орталығының жұмысы мен қорғаншылық органдары қызметкерлерінің санын арттыру мәселесі көтерілді. Қабылданған заңға сәйкес, 5000 балаға 1 қызметкерден келуі керек. Осылайша, облыста 109 қызметкер болуға тиіс, әр ауданда шамамен 10 маманнан.
390 рет оқылды
