Ұлттық банк теңгенің айырбас бағамының күрт ауытқуын шектеу шараларын жүргізіп жатыр. Бұл туралы ҚР Ұлттық банкі төрағасының орынбасары Виталий Тутушкин Парламентте республикалық бюджетті талқылау кезінде айтты, деп хабарлайды ҚазАқпарат.
«Ұлттық банк айырбас бағамының күрт ауытқуын және оның кейіннен инфляцияға көшуін шектеу шараларын қолға алды. Кей күндері валюталық интервенциялар жүргізді. Жүргізілетін операциялар туралы ақпарат уақытында жарияланып отыр», - деді Тутушкин Мәжілістің жалпы отырысында.
Оның айтуынша, квазимемлекеттік сектор субъектілерінің валютаны сату көлемін ұлғайту мақсатында олардың валюталық түсімді міндетті сату мөлшері 75%-ға дейін ұлғайды.
Инфляцияға қарсы саясатты күшейту үшін Үкімет Ұлттық банкпен бірге биылғы ақпаннан бастап «2022-2024 жылдарға арналған инфляция деңгейін бақылау және төмендету жөніндегі жаңартылған шаралар кешенін» іске асырып келеді.
«Геосаяси жағдайдың нашарлауына байланысты жаһандық қаржы, тауар нарықтарында бұрын-соңды болмаған өзгерістер аясында теңгенің айырбас бағамы биыл 15 наурыздағы сауда-саттық қорытындысы бойынша ең жоғары деңгейде 512,17 теңгеге дейін әлсіреді, бірақ 19 сәуірге қарай 443,85 теңгеге дейін нығайып, шығынның қомақты бөлігін жапты», - деді Ұлттық банк өкілі.
563 рет оқылды
