Сурет ашық дереккөзден алынды
Украинаның жемқорлықпен күрес жөніндегі жоғарғы соты Әділет министрлігінің экс-президент Виктор Януковичтің барлық мүлкін тәркілеу жөніндегі арызын қанағаттандырды, деп хабарлайды Азаттық.
Сот мәліметінше, Януковичтің Киев түбіндегі резиденциясы, Сухолуьедегі қонақ үй-мейрамхана кешені, Киевтің Оболон жағалауындағы пәтері, банк есептеріндегі қаражаты (1 миллион доллардан асады), кәсіпорындардағы үлесі, сонымен бірге 537 мәдени құнды заты (жалпы құны 18,7 млн еуро) тәркіленді. Олардың арасында кітаптар, иконалар, суреттер, антиквар жиһаздар, сағаттар, құмыралар, қылыштар, қарулар, тіпті XIX ғасырдың пушкасы да бар.
Айта кетейік, Янукович 2010-2014 жылдар аралығында Украина президенті болды. 2014 жылғы ақпанда Майдандағы наразылық кезінде елден қашты; мұндай өзгеріс Қырым аннексиясына, Донбастағы жанжалдың басталуына себеп болды.
Украинада Януковичті "мемлекетті сатты" деп айыптады. Оның үстінен басқа да айыптар негізінде қылмыстық істер қозғалды. Айыптардың бірі негізінде оны сырттай 13 жылға соттаған. Қазір Янукович Ресейде тұрады, көптен бері көпшілік алдына шықпаған.
778 рет оқылды
