Фото: ҚР ТЖМ
Төтенше жағдайлар бірінші вице-министрі Ибрагим Күлшімбаев Абай облысындағы орман өрті қашан толығымен сөнетінін айтты, деп хабарлайды Sputnik Қазақстан.
Сенат кулуарында журналистер Абай облысындағы өрттің қашан сөнетінін сұрады.
"Жақын арада, өртті сөндіру төрт-бес күнге дейін созылуы мүмкін", - деді Күлшімбаев.
Айта кетері, 14 маусымда облыстағы өрт ошақтары оқшауланған еді. Сонымен қатар өрт толық жойылғанға дейін оқшауланған ошақтардың орындарына үнемі су төгу және өрттің шетіне топырақ себу жүзеге асырылады.
Вице-министрдің айтуынша, Төтенше жағдайлар министрлігінде су ағызатын құрылғымен жабдықталған 33 тікұшақ бар. Бірақ оның тек 16-сы ғана өртті сөндіруге арналған. Қалғандары іздеу, барлау жұмыстары үшін.
"Бірақ олардың бәрін бір мезетте пайдалану мүмкін емес, себебі қандай да жоспарлы жұмыстар болады. Сондықтан олардың жартысына жуығы үнемі жөндеуде тұрады. Ал өрт сөндіретін ұшақтарымыз жоқ, біз оған ақша сұрадық, бірақ қаржы қарастырылмады. Сол себепті біз әлі ұшақ сатып алған жоқпыз", - деді ол.
904 рет оқылды
