08 мау, 2021 сағат 15:00

Түркия инвесторлары Қазақстанда күкірт бетонитін өндірмек

Түркия инвесторлары Қазақстанда химия өнеркәсібі саласындағы жобаны жүзеге асыруға дайын. Бұл туралы ҚР Сыртқы істер министрлігі хабарлады.

Химия өнеркәсібіндегі жобаны іске асыру перспективалары «Kazakh Invest» ҰК» АҚ ұйымдастырған түрік инвесторларының Қазақстанға сапары барысында талқыланды. Қызметтік іссапар аясында «BRIMSTONE Sulphur Provider Company» компаниясының негізін қалаушы Эфе Мунип Нурдогду «Kazakh Invest» Басқарма төрағасы Мейіржан Юсуповпен кездесті.

Инвестордың айтуынша, жоба Қазақстанның батыс өңірлерінің бірінде күкірт бетонитін өндіруді көздейді. Жобаға салынған инвестициялардың жалпы сомасы шамамен 10 млн долларды құрайтыны жоспарлануда. 50-ге жуық жаңа тұрақты жұмыс орны құрылмақ. Жобаны іске асыру биылғы жыл соңында басталмақ.

Сондай-ақ инвестор аталмыш саланың негізгі артықшылықтары мен жобаның экспорттық әлеуеті туралы айтып өтті.

«Қазақстанда күкірттің жеткілікті қоры бар. Алайда, біз үшін де, жалпы ел үшін де шикізатты терең өңдеуді ұйымдастыру, дайын өнімді күкірт бентониті түрінде шығару және экспорттау әлдеқайда орынды. Логистикалық тұрғыдан алғанда, Қазақстан бұл жобаны жүзеге асыру үшін өте ыңғайлы инвестициялық алаң. Біз бұл елде жылдам дамып келе жатқан нарық салаларына шығудың үлкен әлеуетін көріп отырмыз. Соның ішінде бізді Қытай, Еуропа және Ресей нарықтары қызықтырады»,- деп атап өтті Эфе Мунип Нурдогду.

Өз кезегінде «Kazakh Invest» Басқарма төрағасы Мейіржан Юсупов инвестицияларға мемлекет тарапынан көрстетілетін қолдау шаралары, жеңілдіктер мен преференциялардың кең спектрі туралы егжей-тегжейлі баяндап берді.

Айта кету керек, сапар аясында түрік компаниясы «ҚазМұнайГаз «ҰК» АҚ-мен, сондай-ақ мұнай өндіруші «NCOC», «Теңізшевройл», «KPO» сынды ірі компаниялар өкілдерімен шикізатпен қамтамасыз ету мәселесіне қатысты бірқатар келіссөз жүргізбек.

«Brimstone» компаниясы 2017 жылы Измир қаласында құрылған. Зауыттың өндірістік қуаты айына 6 000 тонна. «Brimstone» қызметінің негізгі бағыты күкірт және ілеспе өнімдер болып табылады.