Фото: Polisia.kz
Түркістан облысының полицейлері “Қорғау” бағдарламасының көмегімен төленбеген 6,6 миллион теңге берешегі бар жүргізушіні анықтады. Бұл туралы Түркістан облысы ПД бастығының бірінші орынбасары Бағланбек Айтпаев брифинг кезінде мәлімдеді, – деп хабарлайды Polisia.kz.
Нақтырақ айтсақ, Түркістан облысының патрульдік полиция батальоны қызметкерлерінің планшеттеріне “Қорғау – қауіпті жүргізуші” мобильдік бағдарламасы арқылы төленбеген айыппұлдары бар Volkswagen Passat автокөлігі туралы ақпарат берілген.
Тәртіп сақшылары ақпарат бойынша бірден іске кірісіп, аталған көліктің жүрген жерін анықтап, Шымкент – Самара тас жолында тоқтатқан.
Тексеру кезінде бұл автокөліктің сот орындаушысының қаулысына сәйкес, жалпы сомасы 6,6 миллион теңге төленбеген айыппұлдар бойынша берешегі бары анықталған. Жүргізушінің әкімшілік айыппұлдарының 80 пайызы - жылдамдық режимін бұзумен байланысты.
"Тәртіп сақшылары Volkswagen Passat автокөлігін айыптұраққа қойып, жүргізушімен берешекті уақытылы төлеу қажеттігі туралы түсіндіру жұмыстарын жүргізді.
Түркістан облысының полицейлері көлік құралдарының жүргізушілерін жол қозғалысы ережелерін қатаң сақтауға және салынған әкімшілік айыппұлдарды уақытылы төлеуге шақырады", – деп атап өтті Түркістан облысы ПД бастығының бірінші орынбасары Бағланбек Айтпаев.
588 рет оқылды
