Түркістан музыкалық драма театрында ІІ маусымның шымылдығы түрілді. Жаңа маусымның ашылуында «Қорқыт туралы аңыз» пластикалық қойылымы сахналанды.
Маусымашарға Түркістан облысы мәдениет басқармасының
басшысы Ә.Қойлыбаев, қала қонақтары мен тұрғындары қатысты. Қоюшы-режиссері –
К. Семенов. Композиторы – Х. Шанғалиев. Көркемдік жетекшісі – А Көпбасарова.
Мемлекет және қоғам қайраткері, жазушы-драматург Ермек
Аманшаевтың либреттосы бойынша сахналанған спектакльде бас кейіпкер көрген
түсінен шошып, өлімнен қашады. Жерұйық мекенді іздейді. «Қайда барса да,
Қорқыттың көріне» кезігіп, ақыры туған жері – Сырдарияға оралады.
Екі күн қатарынан өткен маусымашарға келушілер
қарасы көп болды. Ашылғанына небәрі жыл толса да, жас театр бұған дейін
«Бөрте», «Фариза», «Махаббат мұнарасы» сынды қойылымдарды сахналап, көпшілікке
ұсынған болатын. Осылайша өз көрерменін қалыптастырып, Түркістанның
мәдени-рухани дамуына, туристік әлеуетін арттыруға үлес қосып жүр.
Еске сала кетейік, 22-23 қазан күндері аталмыш
театрда премьера өтеді. Тұңғыш рет қазақ сахнасында «Триптих: «Гамлет»,
«Қарагөз», «Фауст» қойылымы сахналанбақ. М.Әуезов, У.Шекспир, И. Гёте сынды үш
алыптың шығармасы Түркістан театры сахнасында тоғысатын болады.
1447 рет оқылды
