Елорда әкімі Алтай Көлгіновтің төрағалығымен Төтенше жағдайлардың алдын алу және жою жөніндегі комиссияның отырысы өтті, деп хабарлайды "Ұлт ақпарат" қала әкімінің баспасөз хатшысы Ақмарал Олжабаеваға сілтеме жасап.
Қаланың азаматтық қорғау қызметтері тәулік бойы күшейтілген қызмет атқару нұсқасына көшті. Қоғамдық тәртіпті, халықтың тыныс - тіршілігін және көліктің жұмыс істеуін қамтамасыз ететін объектілерді, аса маңызды мемлекеттік және стратегиялық, ерекше режимді, режимдік және ерекше қорғалатын объектілерді қорғау күшейтілді.
Осылайша:
- Ірі сауда нысандары мен сауда ойын-сауық орталықтарының жұмыс істеуіне шектеу қойылады, олар сағат 10.00-ден 18.00-ге дейін жұмыс істейді (азық-түлік дүкендері мен супермаркеттерді қоспағанда);
- Азық-түлік дүкендері, супермаркеттер мен азық-түлік базарлары санитарлық және дезинфекциялық шараларды күшейте отырып, әдеттегі режимде жұмыс істейді.
- Киім-кешек базарлары сағат 11.00-ден 17.00-ге дейін жұмыс жасайды. Санитарлық және дезинфекциялық шаралар күшейтіледі. Қоғамдық тамақтану орындарында, сауда ойын-сауық орталықтарындағы фуд-корттар дезинфекциядан өтіп тұрады;
- Азық-түлік қауіпсіздігі шараларын тиімді іске асыру қамтамасыз етіліп жатыр, оның ішінде әлеуметтік маңызы бар азық-түлік тауарларын жеткізу мен бағаны тұрақтандыру қамтамасыз етілуде;
- Қоғамдық көліктер қалыпты режимде жұмыс істейді. Соңғы аялдама пунктерінде автобустар дезинфекциядан өтеді.
- Балабақшалар қалыпты режимде жұмыс істейді. Медициналық және санитарлық бақылау күшейтіледі. Баланы апару не апармауды ата-ана өзі шешеді.
-Мектептен тыс қосымша білім беру объектілерінің (оқушылар сарайы, шығармашылық сарайлары, аула клубтары, үйірмелер, секциялар, компьютерлік клубтар) қызметі тоқтатылды; сондай-ақ барлық спорт нысандары жабылды. Оқу-жаттығу жиындары, спорт түрлері бойынша жаттығулар, барлық деңгейдегі жарыстар тоқтатылды;
- Ойын-сауық, спорттық (көрермендердің қатысуынсыз өтетіндерді қоспағанда) және басқа да бұқаралық іс-шараларды, сондай-ақ отбасылық, салт-дәстүр іс-шараларын өткізуге тыйым салынады;
- Кинотеатр, театрлардың, көрмелердің және көңіл көтеру орындарының (түнгі клубтар, караоке, бар, компьютерлік клубтар, фитнес-орталықтар, жаттығу залдары, бассейндер) және адамдар көп жиналатын басқа да нысандардың қызметі тоқтатылды;
- Мейрамхана, дәмханалардың және өзге де қоғамдық тамақтану орындарының жұмыс уақыты 22.00 сағатқа дейін шектелді, бұл ретте бір жолғы адамдар саны 50-ге дейін шектеледі;
- Дәмхана мен мейрамханаларда және басқа жерлерде кальяндарды пайдалануға тыйым салынады;
- Мекемелерге қызметкерлерін қашықтан жұмыс жасау режиміне ауыстыру ұсынылды.
Сондай-ақ денсаулық сақтау объектілерінде және қарт кісілер мен мүмкіндігі шектеулі жандарға арналған медициналық-әлеуметтік объектілерде, әлеуметтік оңалту орталықтарында, балалар үйінде, ерекше қажеттілігі бар балаларға арналған оқу орындарында, интернаттарда санитарлық-дезинфекциялық режим күшейтілді. Оларға келушілерге тыйым салынды.
Коронавирус инфекциясы жағдайында оның өршуіне жол бермей, жоюға медициналық объектілердің дайындығы қамтамасыз етілді. Коронавирус инфекциясы анықталған жағдайда науқастарды ауруханаға жатқызу қамтамасыз етілді, медициналық тексеруден өтуге және емделуден бас тартқан, карантин режимін сақтауға бейжай қарап, эпидемиологиялық жағдайды және басқа жағдайларды анықтауда қолында бар мәліметтерді жасырған кісілерге бақылау күшейтілді.
1140 рет оқылды
