26 ақп, 2022 сағат 10:10

"Тізерлеп отырғызып ұрды": соққыға жығылған полицей басынан өткен жағдайды айтты

Алматы полициясының метрополитен бөлімінің қызметкері Асыл Дүйсембеков жаппай тәртіпсіздік кезінде қатты соққыға жығылған. Оны бұзақылар тізерлеп отырғызып, тепкінің астына алған. Бұл жағдай мегаполис көшелеріндегі бейнебақылау камерасына түсіп қалды, – деп хабарлайды Polisia.kz.

“Формамды алып өртеп тастады. Жұмыс куәлігімді, жеке куәлігімді, қалтамда не болды, соның барлығын алды. Бөгенбай – Сейфуллин көшелеріне дейін ұрып, тоқпақтап апарып, тізерлеп отырғызды”, – деді тәртіп сақшысы.

Қаскөйлер полицейді топтың алдында тірі қалқан етіп ұстаған.

Полиция қызметкерінің айтуынша, оны өзінің әріптестері құтқарып қалған.

"Әріптестеріме рақмет. Қазір сол кісілердің арқасында аман-сау тұрмын. Барлығымыздың анамыз бар. Оларға да оңай емес екен, өз баласын соққының астында көрген", – деп атап өтті ол.

Асыл Дүйсембеков ішкі істер органдарындағы қызметке әкесінің жолын қуып келген. Полицей алдағы уақытта да өз міндетін атқарып, жұмысын жалғастыруды көздейді.