Қазақстанның бірінші ракеткасы Елена Рыбакина жаңартылған әлемдік рейтингіде 13-орынға көтерілді, деп хабарлайды ҚазАқпарат.
Қазақстан теннис федерациясы мәлім еткеніндей, қазақстандық спортшы өзінің рекордтық көрсеткішіне қол жеткізіп, үздік ондыққа жақындады.
Тағы бір қазақстандық Юлия Путинцева 43-сатыда болса, Зарина Дияс 102-ден 108-ге сырғыды.
Жұптық сында Е.Рыбакина 50-ден 52-ге төмендесе, Анна Данилина 75-орында қалды. Жібек Құламбаева бірден 56 саты жоғарылап, 319-орынға жайғасты.
Ерлер арасында Қазақстанның бірінші ракеткасы Александр Бублик 35-орында болса, Дмитрий Попко 180-нен 177-ге, Михаил Кукушкин 182-ден 180-ге көтерілді.
Жұптық сында Андрей Голубев 27-інші, Мельбурн турнирінің финалына шыққан Александр Недовесов 69-орынға орнықты.
Елена Рыбакина тағы бір ірі дода – Сидней турнирінде өнер көрсетеді. Ол алғашқы айналымда өткен жылы іріктеу сайыстарынан өтіп, АҚШ ашық чемпионатының жеңімпазы атанған ұлыбританиялық Эмма Радуканумен шеберлік байқасады.
1124 рет оқылды
