Теміртауда қарақшылық жасап, адам өлтірген қылмыстық топ ұсталды, деп хабарлайды Polisia.kz ресурсы.
20 қарашада Теміртау қаласының полиция бөліміне 32 жастағы қала тұрғыны хабарласқан. Ол Момышұлы көшесіндегі көпқабаттың үйдің пәтеріне белгісіз біреулер кіріп келіп, тапаншамен қорқытқанын айтқан.
Содан кейін қарақшылар әйелді және оның 50 жастағы серігін байлап, екеуін ұрып-соққан. Ер адам алған жарақатынан оқиға орнында көз жұмады.
Қылмыскерлер үйдегі ақша мен дүние-мүлікті алып, кетіп қалған.
Бұл жайт ҚР Қылмыстық кодексінің 99-бабы, 2-бөлімі және 192-бабы, 3-бөлімі бойынша тіркелді.
Кешенді тергеу кезінде 4 күдікті анықталды.
26 және 28 қарашада жүргізілген арнайы операция кезінде күдіктілер Нұр-Сұлтаннан және Жезқазғаннан ұсталды. Олар - 25, 29, 34 және 39 жастағы Сәтпаев, Жезқазған және Нұр-Сұлтан қаласының тұрғындары.
«Пәтерді қарау кезінде әртүрлі маркалы қару-жарақ пен оқ-дәрі табылды. Қазіргі таңда күдіктілер изоляторға қамалған, тергеу жүріп жатыр. Қаскөйлердің басқа да қылмыстарға қатысы бар-жоғы тексеріліп жатыр» дейді Қарағанды облыстық полиция департаменті бастығының орынбасары Әбіл Әбілдин.
1014 рет оқылды
