фото: Tengrinews.kz
Белгілі қазақстандық журналист әрі медиаменеджер Батыр Қазыбаев бақилық болды, деп хабарлайды "Ұлт ақпарат".
Батыр Қазыбаевтың дүниеден озғанын ҚР Ақпарат және қоғамдық даму министрі Асқар Умаров жеткізді.
«Бүгін отандық медиа саласы ауыр қайырға ұшырады. Ұзаққа созылған сырқаттан мықты медиаменеджер, кәсіби журналист, әріптесіміз Батыр Қазыбаев дүниеден өтті. Ірі медиажобаларды жүзеге асырған, отандық журналистикада өзіндік қолтаңбасы қалған, мектеп қалыптастырған әріптесіміз біраздан бері сырқат еді. Жақындарына, «Алаш медиа» ұжымына және журналист қауымына қайғырып көңіл айтамын. Иманы жолдас болсын. Батырдың жарқын бейнесі біздің жадымызда сақталады», - деп жазды министр Facebook парақшасында.
Батыр Қазыбаев - белгілі қазақстандық журналист әрі жазушы, көп жыл бойы облыстық және республикалық газеттердің редакцияларында басшылық лауазымдарда қызмет атқарған, Қазақстан Компартиясы ОК хатшысы болған Кәкімжан Қазыбаевтың ұлы. Ол әкесінің жолын қуып, журналистиканы таңдап, табысты медиаменеджер болды.
10 жылдан астам уақыт құрамына Tengrinews.kz, Vesti.kz, Massaget.kz ақпараттық порталдары кіретін медиахолдингті, Жұлдыз FM радиостанциясы, Ретро FM Қазақстан, СТВ телеарнасын басқарды, "Жетінші арнаның" негізін қалады.
Ұлт порталының ұжымы Батыр Қазыбаевтың туған-туыстары мен жақындарына қайғырып көңіл айтады.
1073 рет оқылды
_80_80.jpg)
