Тайландта дем алып келген петропавлдық отбасыдан коронавирустың белгілері байқалып, олар ауруханаға түсті, деп хабарлайды "Ұлт ақпарат".
Петропавлда әлеуметтік желілерде бет-аузын тұмшалап, ерекше киінген медицина қызметкерлерінің екі «жедел жәрдем» көлігіне адамдарды отырғызып жатқаны туралы бейнеролик тарап кетті. Осы бейнежазбаға байланысты СҚО Денсаулық сақтау басқармасы түсінік берді.
«Ерлі-зайыпты екі баласымен Тайландтан дене қызуы көтеріліп, ауырып келген. Отбасының барлық мүшелерін қалалық аурухананың жұқпалы аурулар бөлімшесіне коронавирус жұқты деген күдікпен жатқыздық. Зерттеу мен зертханалық талдау барысында біздің күдігіміз расталмады. Әлеуметтік желіде таралған бейнежазбада медициналық қызметкерлер тиісті әрекет ету алгоритмі бойынша жұмыс істеді», - делінген ресми ақпаратта.
Қазіргі уақытта ер адам қалалық ауруханалардың бірінде, ал оның жұбайы мен 3 және 7 жастағы екі баласымен облыстық балалар ауруханасының жұқпалы аурулар бөлімінде ем алып жатыр. Дәрігерлердің сөзіне қарағанда, науқастар тұмау жұқтырған. Жағдайлары ауыр, әзірше дене қызуы түскен жоқ.
1159 рет оқылды
