Шымкент тұрғындары жол жөндеуге шықты. Қала әкімдігі шұрық-тесік жолдарды тұрғындардың өздері жөндеп жатқан видеоға қатысты түсініктеме берді, - деп хабарлайды "Хабар 24" арнасы.
"Қайнар бұлақ" саяжай массивінде түсірілген бейнежазба әлеуметтік желіде тараған болатын.
Бұл жазбаны жергілікті тұрғын Сергей Фролов түсірген. Оның сөзінше, жол сапасы нашар болғандықтан, көлік апаты жиі болады. Халық әкімдіктен көмек сұраған. Бірақ уәделерін уақытылы орындамағандықтан, тұрғындар оны өз қаражатына жасауға шешім қабылдапты.
"Мына жерге екі қап қиыршық тас әкелу қиын емес шығар деп ойлаймын. Асфальт деген атымен жоқ. Ақша қарастырылған ба, жоқ па? Нақтысын білмедім. Бұл маңда қозғалыс көп. Әкімнің орынбасары келіп, өзі көріп кетті. Сонымен болды, еш шаруа басталған емес", - дейді тұрғын Сергей Фролов.
Қалалық жолаушылар көлігі және автомобиль жолдары басқармасындағылар бұл мәселеден хабардар. Қайнар бұлақтағы жөндеу жұмыстары енді тамыз айында басталады деп сендіріп отыр.
"Күтіп ұстау жұмыстарын наурыз айының басында бастау керек болса, біз сәуір айының аяғында бастадық. Бір айға кешігіп бастадық. Кешегі күннен бастап, осы Қайнар бұлақтағы көтерілген мәселе бойынша мердігерге тапсырма берілді. Соның негізінде жұмыстар басталды. Біздің жоспарымыз бойынша тамыз айының 10-на дейін Қайнар бұлақта кешіліктер толығымен орындалады", - дейді қалалық Жолаушылар көлігі және автомобиль жолдары басқармасы басшының орынбасары Мадияр Байымбетов.
1271 рет оқылды
