Шымкентте жолаушыларды 1,5 млн теңгеге алдаған такси жүргізушісі сотталды, – деп хабарлайды Polisia.kz.
Жергілікті тұрғын жолаушыларды жеткізіп салу барысында сөзге тарта отырып, пәтер алуға көмектесемін деп сендірген. Азаматтың сөзіне сенген қарапайым адамдар қызметі үшін сұраған 100-500 мың аралығындағы қаражатты берген. Осылайша жалпы жеті азаматты алдаған алаяқ 1 млн 585 мың теңге көлемінде шығын келтірген.
"Бұл жайт бойынша полицияға арызданған тұрғындардың басынан өткен жағдайы ұқсас болғандықтан, бір іске біріктіріліп, ҚР ҚК-нің 190-бабымен (Алаяқтық) тіркелген.
Жедел-іздестіру жұмыстары барысында жәбірленушілерден жауап алынып, олардың ақша аударымдары тексерілді. Нәтижесінде, күдіктінің жеке басы анықталып, тұрғылықты мекенжайы бойынша ұсталды.
Тергеу барысында азамат өз кінәсін толығымен мойындап, келтірген шығынды қайтарып берген. Алайда азаматтың іс-әрекетінде алаяқтық бойынша қылмыстық құрам болғандықтан, іс айыптау актісімен сотқа өткен. Сот шешімімен ер адамға ҚР ҚК-нің 190-бабы 3-бөлігінің 4-тармағында көрсетілген қылмыстық құқық бұзушылық жасағаны үшін төрт жыл алты айға бас бостандығын шектеу жазасы тағайындалды" - делінген хабарламада.
441 рет оқылды
