Көрнекі фото: ашық дереккөзден
ШҚО Экология департаменті басшысының орынбасары жемқорлық дерегімен әшкереленді, деп хабарлайды Антикор баспасөз қызметі.
"Шығыс Қазақстан облысының Сыбайлас жемқорлыққа қарсы қызметі Ұлттық қауіпсіздің комитетінің Департаментімен және прокуратурамен бірлесіп, жасырын тергеу әрекеттерінің нәтижесінде облыстың Экология департаменті басшысының орынбасарын әшкереледі.
Ол ҚР ӘҚБтК-нің 328-бабы 4-бөлігі (Қоршаған ортаға жол берілетін антропогендік әсер ету нормативтерін бұзу) бойынша өңірдегі кәсіпорындардың бірін әкімшілік жауаптылыққа тартпағаны үшін ірі көлемде пара алды деген күдікке ілінді.
Соттың санкциясымен күдікті қамауға алынды" - делінген хабарламада.
Қылмыстық-процестік кодексінің 201-бабына сәйкес тергеу мүддесі үшін өзге ақпарат жария етуге жатпайды. Конституцияның 77-бабы 3-тармағының 1-тармақшасына және Қылмыстық-процестік кодексінің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі.
529 рет оқылды
