27 қаң, 2023 сағат 15:34

Шетелдік нөмірлі көліктер техникалық тексеруден өте алады - министрлік

Сурет ашық дереккөзден алынды

27 қаңтардан бастап міндетті техникалық байқаудың бірыңғай ақпараттық жүйесінің операторы Қазақстанның барлық аумағында шетелдік автокөлік құралдарына техникалық тексеруден өту мүмкіндігін қамтамасыз етеді, деп хабарлайды "Ұлт ақпарат" Индустрия және инфрақұрылымдық даму министрлігіне сілтеме жасап.

Бұл ретте шетелдік нөмірлі автокөліктің иелері немесе жүргізушілері 1815 техникалық тексеру орталығының кез келгенінен міндетті техникалық байқаудан өте алады.

Аталған орталықтардың мекенжайлары мен жұмыс уақыты ведомствоның miid.gov.kz сайтында (құжаттар бөлімінде) жарияланған тізімде көрсетілген.

Еске сала кетейік, былтыр 30-шы желтоқсанда «Қазақстан Республикасының кейбір заңнамалық актілеріне Мемлекет басшысының жекелеген тапсырмаларын іске асыру мәселелері бойынша өзгерістер мен толықтырулар енгізу туралы» ҚР Заңына қол қойылған еді.

Соған сәйкес «Жол қозғалысы туралы» Заңында қарастырылған 88-баптың 1-бөлігіне басқа мемлекеттерде тіркелген автокөлік құралдары Қазақстан Республикасының аумағына әкелінген немесе кірген сәтттен бастап, 90 күнтізбелік күн асқан бойда міндетті техникалық байқаудан өткізілуіне байланысты толықтырулар енгізілген болатын.