Фото: t.me/KZgovernment
Павлодар облысының әкімі Асайын Байханов қала әкімі орынбасарының жемқорлық күдігімен ұсталуы туралы пікір білдірді, деп хабарлайды ҚазАқпарат агенттігі.
«Бұл мәселе туралы сіздерге белгілі мәліметті ғана білемін. Ал бағаны тергеу орындары мен сот беру керек. Сондықтан тергеудің аяқталғанын күту керек деп қана айта алам», - деді ол БАҚ өкілінің сауалына берген жауабында.
Сондай-ақ, ол аталған шенеуніктің бұған дейін де қол астында істегенін еске салды.
«Өз атымнан мен Павлодар қаласының әкімі болып тұрғанда Қалиақпаров Тұрғын үй-коммуналдық шаруашылық бөлімінің басшысы болғанын ғана айта алам. Ол кезде мойнына артылған тапсырмаларды адал, жауапкершілікпен орындайтын. Оған не болғанын айта алмаймын. Қазақта «Семіздікті қой ғана көтереді» деген сөз бар. Дәлме-дәл орысшалау қиын. Бірақ мағынасы байлықтың буын әркім көтере бермейді дегенге келеді. Кейде адамдар өзгереді. Мен мемлекеттік қызмет, жалпы жоғары лауазым деген үлкен жауапкершілік жүктейді деп есептеймін. Яғни, әрдайым сынақтың астындасың. Ал кез келген сынақтың соңында не жазаға, не марапатқа жолығасың», - деді Асайын Байханов.
2561 рет оқылды
