Ертістегі мұзды жару жұмыстары Семей су жолдары кәсіпорнына да шығын келтірді, деп хабарлайды ҚазАқпарат.
Ертістегі мұзды жару жұмыстарынан кейін алып мұздықтар, ауыр жүк кемелерінің бір-біріне соқтығысуына алып келген. Оқиға Тихомировский айлағында болды. Мұнда өндірістік флотқа арналған айлақ орналасқан. Яғни, бұл жер жүк кемелерінің қысқы тұрағы. Мұз жарылғаннан кейін жүре бастаған сең шағын жүк кемелерін бірін-біріне соғып тастаған.
«Мұны қазір жауапты мекеме өкілдері тексеру керек. Егер баржа белгіленген орында тұрған болса, бұл бір мәселе, ал егер ол рұқсат беретін құжатсыз тұрса, бұл мүлде басқа мәселе болмақ. Сондықтан тексеру керек», - деді ШҚО әкімі Даниал Ахметов.
Еске салайық, Ертісте мұзды жару жұмыстары 28 наурыздан бастап жүргізілуде. Мұз кептелісінің салдарынан өзен арнасынан шығып, тұрғын үйлерге қауіп төндірген болатын.
Бұған дейін мұзды жару жұмыстары кезінде көпқабатты тұрғын үйлердің терезелері сынып, бір адам жарақаттанғанын хабарлаған болатынбыз.
2538 рет оқылды
