Семейдің екі көшесіне қазақ әдебиеті мен музыка өнерінің дамуына өлшеусіз үлес қосқан біртуар тұлалардың есімі берілді, деп хабарлайды "Ұлт ақпарат".
2018 жылы республикалық ономастикалық комиссия отырысында қаладағы Строительная көшесін әнші-композитор Тұрсынғазы Рахимовтың және Крупская көшесін Қазақстанның халық жазушысы, соғыс ардагері Әзілхан Нұршайықовтың есіміне ауыстыру туралы шешім қабылданған-тын.
Бүгін қос көшенің салтанатты ашылуы өтті.
«Бүгін қаламызда халық жазушысы Әзілхан Нұршайықов көшесі пайда болды. Әзаға өзінің еңбектерімен бірнеше буынды тәрбиеледі. Ең танымал шығармаларының бірі «Махаббат қызық мол жылдар» романы халқымыздың асыл қасиеттерін насихаттап, жастарға жарасымды өмір үлгісін ұсынды. Бүгінгі шара батыр бабамызды ұлықтаудың жарқын көрінісі. Осы игі бастаманы қолдап, көше атауын беруге мұрындық болған жанашыр жерлестерге зор ризашылық білдіремін», - деді қала əкімі Ермак Сəлімов.
Жалпы қалада 1042 көше бар. Соның тек 382-сі ғана мемлекеттік тілде. Республикалық ономастикалық комиссияның шешімімен бұған дейін Ленин көшесі - Мәңгілік Ел, Полковничий аралы - Бейбітшілік аралы, Интернациональный көшесі - Қайым Мұхамедханов, Дальняя - Закария Белібаев көшесі болып өзгерген болатын.
Айта кетейік 2018 жылы республикалық ономастикалық комиссия 7 көшені қазақтың ақын-жазушыларының есіміне ауыстыру туралы ұсынысты қолдады.
Алдағы уақытта қалған бес көше атап айтқанда Комсомольская көшесі - Жібек жолы, Кутузов көшесі - Ардагерлер көшесі, Колхозная көшесі - Берел, Социалистическая - Самал, Декабристов - Нұрсая көшесі болады.
3612 рет оқылды
