«Өз еліңді таны» атты республикалық жастар экспедициясы өтеді

Қазақстан Республикасы Ақпараттық және қоғамдық даму министрлігі «Рухани жаңғыру» бағдарламасын іске асыру аясында Қазақстан халқының ортақ құндылықтарын шоғырландыруға бағытталған «Қазақтану» жобасын іске асыруда. «Қазақтану» жобасының басты мақсаты жастарды қазақ халқының құндылықтары, әсіресе тұңғиық тарихын насихаттауға, дәріптеуге кеңінен тарту.

Экспедиция жұмысына Қазақстан республикасының өңірлеріндегі этномәдени бірлестіктерінің жастар қанатының мүшелері, «Жаңғыру жолы» республикалық жастар қозғалысының мүшелері (моноқалалар, аудан орталықтары мен ауылдардан келген жастарға басымдылық берілуде) шақырылды.

«Өз еліңді таны» республикалық жастар экспедициясына еліміздің барлық аймақтарынан 170 адам қатысады. Экспедиция екі кезеңде өтеді. Экспедицияның бірінші кезеңі 2019 жылдың 18-19 қарашасында өтеді. Оларға елорданың мұражайларында тұлғалармен «Өз еліңді біл» мотивациялық кездесулері өтеді. Кездесу барысында викторина және Қазақстан тарихын білуге арналған квест ойыны ұйымдастырылады. Екі күннің ішінде экскурсия барысында елорданың қасиетті жерлеріне барумен қатар гидтердің сүйемелдеуімен қаланың сакралды жерлеріне экскурсия ұйымдастырылады.

Экспедицияның ІІ кезеңі Ақмола облысында 2019 жылдың 20-22 қарашасында өтеді. Ақмола облысының Бурабай курорттық аймағына ыңғайлы автобустардың көмегімен тасымалданып қатысушылар Бурабай кентіндегі лагерьлердің бірінде орналасады.

«3 күн ішінде киелі жерлерге және туристік нысандарға сапарлар ұйымдастырылады: Абылай хан алқабы, Оқжетпес тауы, Құмай археологиялық-этнографиялық кешені «Базок» тарихи-мәдени ескерткіші және басқа да нысандарында археологиялық дәрістер өтеді. Онда өлкетанушылармен, археологтармен және тарихшылармен тақырыптық кездесулер өтеді. Кәсіби тарихшылар экспедицияға қатысушылардың кешкі демалысын ұйымдастыруға қатысады», делінген хабарламада.

Іс-шара соңында экспедиция туралы электронды фотоальбом дайындалады.