26 мам, 2022 сағат 09:45

Оралда дүкен сөрелерінде қант жоқ. Келесі жеткізілім қымбаттауы мүмкін

Оралда дүкен сөрелерінде қант жоқ. Бар жерлерде келісі 600 теңгеден. Сатушылар жеткізушілер қант әкелмей жатқанын айтып шағымданды, - деп хабарлайды Tengrinews.kz агенттігі КТКтелеарнасына сілтеме жасап.

Гүлайым Жақсыбекова орталық базарда күні бойы тұрса да сауда дұрыс болмайтынын, сатып алушылар тек қант сұрайтынын айтады.

"Келушілер қантты күн сайын сұрайды. Қанттың жоқ болғанына екінші күн. Соңғы рет қоймадан 520 теңгеден алып 560-қа саттық. Бүгін жеткізушілер Жамбылдың қантын әкелуге уәде берген. Күтеміз", - дейді сатушы Гүлайым Жақсыбекова.

Шенеуніктер тапшылықтың себебін Ресей мен Беларусьтен келетін жеткізілімдердің тоқтатылуы деп отыр.

"Біздің облысқа, БҚО-ға аптасына 140 тонна қант келу керек деген келісім бар. Сол жерден біз 30 пайызды өндірушілерімізге өткіземіз", - деді БҚО Кәсіпкерлік және индустриалды-инновациялық даму басқармасының басшысы Жұмакелді Батырниязов.