05 мам, 2023 сағат 17:42

Орал тұрғынына жолдағы шұңқырды айналып өткені үшін айыппұл салынған

Фото: Медет Медресов, mgorod.kz

Оралда жолдағы шұңқырды айналып өткен әйелге айыппұл салынған. Ол сотқа жүгінді, - деп хабарлайды Tengrinews.kz сайты "Мой ГОРОД" порталына сілтеме жасап.

14 сәуірде басылым редакциясына Орал қаласының тұрғыны Дамира Сманқұлова хабарласты. Ол жолдағы терең шұңқырды айналып өткені үшін айыппұл салғанына ашулы. Содан кейін әйел хаттамаға қол қоюдан бас тартқан.

БҚО Полиция департаментінің баспасөз қызметі әйелге қатысты ҚР ӘҚБтК-нің 595-бабы "Маневр жасау ережелерін бұзу" бойынша әкімшілік хаттама толтырылғанын түсіндірді. Айыппұл сомасы 17 мың теңге болады. Кейін әйел сотқа жүгінген. 4 мамырда бірінші сот отырысы өтті.

Сотта әйел айыппұлмен келіспейтінін айтып, шешімнің күшін жоюды сұраған. Оның айтуынша, әйел жолдағы шұңқырды айналып өткен кезде оны полицейлер тоқтатқан.

Орал қалалық жол полициясының аға инспекторы Руслан Асанов әйел маневр жасаған кезде бұрылыс сигналын қоспағанын атап өтті.

"Мен мұны байқап, оны тоқтаттым. Мен өзімді таныстырдым. Құжаттарды сұрадым. Тәртіп бұзушылық туралы хабарладым. Ол балағаттай бастады. Бұл балағаттау бейнежазбада бар, мен оны бердім. Егер жүргізуші өзін лайықты ұстаса, мен профилактикалық әңгіме жүргізіп, оны әкімшілік айыппұл түріндегі жаза қолданбай жіберер едім. Бірақ жүргізуші жөнсіз әрекет жасағандықтан, мен бәрін заң бойынша қолдандым", - деп қорытындылады инспектор.

Бұл ретте полицей жол ережесін бұзу сәті бейнежазбада жоқтығын түсіндірді. Орал қаласының әкімшілік сотының судьясы Ботагөз Баймұханова процеске қатысушылардан қажетті құжаттарды ұсынуды сұрап, сот отырысын кейінге қалдырды.