Алматы қаласында Қазақстан бокс федерациясының кубогы үшін VIII маусымдық жарыстардың жеңімпаздары анықталды. Ақтық бәсекеге жолдама алған Оңтүстік Қазақстан мен Маңғыстау облысының спортшылары өзара мықтыны анықтады, деп хабарлайды "Ұлт ақпарат".
Айта кетейік, Маңғыстаулық боксшылары 2012 және 2016 жылы кубокты жеңіп алса, ОҚО командасы 2015 жылы жеңімпаз атанған болатын. Ақтық сайыста 52 келі салмақта маңғыстаулық боксшы жарақатына байланысты ойыннан шығып, ОҚО командасына бір ұпай жазылды. Сөйтіп боксшы Шалқар Айқынбай жеңімпаз болып танылды. Тартысты өткен бәсекеде маңғыстаулық боксшы, әлем чемпионатының жүлдегері, Азия чемпионы, олимпиадаға қатысушы Берік Әбдірахманов пен Сұлтан Зауырбектің ойыны болды. Екі спортшы да шаршаңқырап қалғандарына қарамастан қайтпай жұдырықтасты.
Алайда қарсыласынан 10 жас үлкен маңғыстаулық боксшының өз өзіне деген сенімділігі жеңіске жеткізді. Маңғыстаулық командаға ұпайды сонымен қатар Нұлбол Қалжанов пен осы жылы өткен Азия чемпионатының күміс жүлдегері Ерік Әлжановтар да қосып үлгерді. Дегенмен бұл жолғы жеңіс оңтүстіктің спортшыларына бұйырды. Шалқар Айқынбайден кейін рингке Азия ойындарының жүлдегері Бағдәулет Ибрагимов пен Бекзод Халметов, Бек Нұрмағамбет, Еркін Мұхаметжан шықты. Еркін Мұхамеджан облысқа алтыншы ұпай алып берсе, Нұржан Бекзатов та қарсыласынан басым түсті. Қорытынды есеп 7:3 болып, оңтүстіктің былғары қолғап шеберлері жеңіске жетті.
Осылайша Оңтүстік Қазақстан облысының боксшылары екінші рет Қазақстан кубогының жеңімпазы атанып, 25 млн теңге ұтып алды.
«Біз команда сапында негізінен жас боксшыларды алып келдік. Олар жас та болса тәжірибелі спортшылар саналады. Бесеуі халықаралық дәрежедегі спорт шеберлері болса, өзгелері спорт шеберлері. Ал ұтып алған 25 млн теңгені өңірде боксты дамыту мақсатында жұмсамақпыз. Атап айтқанда команданың жаттығуына керек-жарақтың бәрін сатып алмақпыз», - деді ОҚО командасының бас бапкері Нұрлан Айтуаров.
3825 рет оқылды
