«Нұр Отан» партиясы Шымкент қалалық филиалы «Жүрек нұры» қорының өкілдерімен бірлесіп, «Балаларға көңіл сыйла» атты қайырымдылық іс-шарасын өткізді. Соның аясында партия өкілдері облыстық балалар ауруханасында емделіп жатқан науқас балаларды қуанышқа бөледі.
Жеке кәсіпкер, партия белсендісі Қайрат Сүлейменовтің айтуынша, бұл шараның басты мақсаты – балаларға қуаныш пен үміт сыйлау.
– Қайырымдылық – халқымыздың ең ізгі қасиеттерінің бірі. Бұл игі шараны өткізе отырып, біз мейірімділік пен өзара риясыз көмек жасауды дәріптейміз. Балалар мен мүмкіндігі шектеулі жандарға қамқорлықтың артуына үлес қосамыз, – дейді атымтай жомарт.
Облыстық балалар ауруханасында емделіп жатқан Айбол Әлтековтің ата-анасы баласының қуанышын көріп, нұротандықтарға ризашылығын білдірді.
– Баламыздың сауығып кетуіне тек дәрігерлер ғана емес, сіздер де атсалысып отырсыздар. Балаларымыздың көз жасын сүртіп, жылы лебізін аямай, қолдан келген жәрдемін ұсынып, достық пейілдерін танытуға келгендеріңізге үлкен рахмет, – дейді ата-аналар.
1219 рет оқылды
