18 ақп, 2020 сағат 13:04

Нұр-Сұлтанда «КамАЗ» көлігі жолаушылар автобусын соқты

Елордада «КамАЗ» автокөлігі 30 жолаушысы бар маршруттық автобусты соқты, деп хабарлайды "Ұлт ақпарат" қалалық Полиция департаментіне сілтеме жасап.

«18 ақпан күні таңғы сағат 08.30-да Р. Қошқарбаев көшесі мен Абылайхан даңғылының қиылысында «КамАЗ» автокөлігінің 54 жастағы жүргізушісі рульді басқара алмай, №22 маршруттық автобусқа соғысты. Р. Қошқарбаев көшесі арқылы Ш. Құдайбердіұлы көшесіне бара жатқан автобус қатты соққыдан қарсы жолаққа шығып кетіп, Төлебаев көшесіне бара жатқан Skoda Rapid көлігімен соқтығысқан», - деп хабарлады департаменттің баспасөз қызметі.

Апат салдарынан «Skoda Rapid» көлігінің 63 жастағы жолаушысы қалалық ауруханаға жеткізілді. № 22 автобуста шамамен 30 жолаушы болды. Олардың ешқайсысы зардап шеккен жоқ.

«КамАЗ» жүргізушісіне қатысты ҚР ӘҚБК 610-бабына сәйкес, әкімшілік хаттама толтырылды. Тексеру жұмыстары жүріп жатыр.