Биыл елорда әкімдігі иесіз қаңғып жүрген ит пен мысықты аулап, асырауға 120 миллион теңге жұмсамақ, деп хабарлайды «Хабар 24».
Әрине, ауыз толтырып айтарлықтай сома. "Осынша қаржыны кім, қайда, қалай жұмсайды" деген сұрақты арна тілшілері анықтауға тырысқан.
Камера мен микрофон ұстап төтеннен келген тілшілерді «Астана ветериналық қызметінің» мамандары мекеме аумағына кіргізбеген. "Жөндеу жүріп жатыр" деген сылтауды желеу етіп, арнайы пресс-турға шақырамыз деп шығарып салған.
«Негізінде бөлінген қаржыны жүйелі жарататын болса, 300 емес, 700 итті де жеке үйшікте ұстауға болар еді. Сондай-ақ мына аумақты уақытылы тазалап, ит пен мысықтың тамағы мен суына жеткізуге болады. Аштан бұралған бұралқы иттерді тамақтандыру үшін күніне 4-5 қап жарма сатып аламыз. Салмағы шамамен 100 келідей болады. Оған қоса, дүкендерден еті сылынған құр сүйекті әкеліп, жарма қосып қайнатамыз. Осылайша, тәулігіне 700 литр ботқа істеп береміз», - дейді еріктілер қозғалысының жетекшісі Юлия Педченко.
«Астана ветеринарлық қызмет» мекемесі мамандарының айтуынша, жүздеген иттің тәуліктік азығы үш қап жем. Дегенмен, еріктілер қамаудағы ит-мысық біздің арқамыза арам қатпай жүр дейді. Себебі қаңғыбас иттерге тамақ алу үшін қалталарынан ақша шығарады.
Еліміздің азаматтық кодексі бойынша иесіз мүлікке екі ай ішінде ешкім қол сұға алмайды. Бұл заң қаңғыбас иттерге де қатысты. Сондықтан қараусыз көше кезіп жүрген ит-мысық мұнда 60 күн қамауда болады. Осы аралықта иесі табылмаса, ары қарайғы тағдыры шешіледі.
«Мекеменің ауласына басып кіріп, үш итті көз алдымызда атып тастады. Біз оларды күнде тамақтандырып, тіпті үйшік салып берген едік. Олар бізге үйреніп, нысанды күзетіп жүрген болатын. Алайда «Астана ветеринарлық қызметі» мамандарына оларды жайратып салып, бөлінген ақшаны қалтаға басу тиімді болды деп ойлаймын», - дейді Нұр-Сұлтан қаласының тұрғыны Екатерина Соколова.
Әлемдік тәжірибеге сүйенсек, дамыған елдерде бұралқы ит пен мысықты бақылайтын, заң тұрғысынан қорғайтын және атқарушы органдар бар. Әрқайсы өз қызметіне жауаппен қарайды. Егер бізде де қаңғыбас хайуандарды аулау мен асырау мәселесін жүйелі жолға салмаса, бұралқы ит пен мысықтың көбеймесе, кемімейтіні белгілі.
2400 рет оқылды
