24 ақп, 2023 сағат 16:25

"Миллиондаған шығынға әкеп соғады" - Польша жүк көлігіне транзитті жапты

Фото: trans.info

250-ден аса қазақстандық жүк көлігі Польша шекарасында тұрып қалды. Осылайша, Еуропаға экспорттық жүктерді жеткізетін қазақстандық тасымалдаушылар шектеулерге ұшырап отыр. Мұның салдары миллиондаған шығынға әкеледі, - деп хабарлайды "Ұлт ақпарат" "Атамекен" ҰКП сайтына сілтеме жасап.

21 ақпаннан бастап Варшава уақыты бойынша сағат 19.00-де Польша-Беларусь «Кукурики-Козловичи» шекаралық өткелінде жүк көліктерінің қозғалысына тыйым салынды. Бұл тыйым Польша республикасы және Еуропалық Одаққа мүше елдер, Еуропалық еркін сауда қауымдастығы (Eat), Еуропалық экономикалық кеңістік туралы келісімге мүше елдерге және Швейцария Конфедерациясында тіркелген көлік құралдарына әсер етпейді.

Алайда, басқа елдер/өңірлерде тіркелген көлік құралдары бұл өткелден өте алмайды.

«Атамекен» ҰКП Логистика және тасымалдау департаментінің басқарушы директоры Мұрат Амриннің айтуынша, «Кукурики-Козловичи» өткелі «Бобровники-Берестовица» өткелі жабылғаннан кейін қазақстандық жүк тасымалдаушылар пайдалана алатын соңғы мүмкіндік болған.

«Жаңа шектеу елімізге Еуропа елдерінен экспорттық тауар және кәсіпорындарға еуропалық тауарларды таситын қазақстандық тасымалдаушыларға да қатысты. Мұның салдары миллиондаған шығынға әкеп соғады. 23 ақпандағы жағдай бойынша Польша аумағында 150-ден аса қазақстандық автокөлік құралы бар. Тағы жүзден астамы Еуропалық Одақ бағытында жүреді. Логистика бұзылған, тасымалдау құны қымбаттайды», – деді Мұрат Амрин.

Сарапшы Польшада ҚР Елшілігі мен ҚР ИИДМ арқылы нақты үйлестіру бар екенін атап өтті.

Қазақстан Елшілігі тарапынан Польшаның мемлекеттік органдарына отандық тасымалдаушылар үшін шектеуді алып тастау қажеттігі туралы ноталар да жолданған.

Еуропалық Одақ пен ЕАЭО елдерін байланыстыратын жалғыз құрлық жолы – Литва-Беларусь, Латвия-Беларусь және Латвия-Ресей шекара өткелдері арқылы өтетін жол. Сондай-ақ, Каспий теңізі арқылы өтетін балама бағыт бар. Алайда бұл бағыт Еуропа елдеріне дейінгі қашықтықты 1,5 есе ұзартып, көліктің бірнеше түрін (авто-теңіз) мәжбүрлі пайдалануға байланысты тасымалдау құнын 2-3 есе арттырады, маршруттағы климаттық және географиялық жағдайлардың әсері (дауыл маусымы, биік таулар және т.б.) тағы бар.

Қазіргі кезде ҚР ИИДМ «Атамекен» Ұлттық кәсіпкерлер палатасы бизнес-қоғамдастықпен бірлесіп, Литва тарапымен (қазақстандық тасымалдаушылар үшін) қазақстандық машиналар ЕО аумағынан Беларусь Республикасы мен Ресей Федерациясы бағытында кедергісіз шығуы үшін Литва Республикасы арқылы кедергісіз өтуді қамтамасыз ету туралы келіссөздер жүргізіп жатыр. Сондай-ақ, Литва тарапына деректерді беру мақсатында өткелде жиналған автомобильдердің тізімі жасалған.