ҚР Парламенті Мәжілісінің жалпы отырысында «ҚР Үкіметі мен Үндістан Үкіметі арасындағы БҰҰ-ның Ливандағы Уақытша күштеріндегі үндістандық батальон құрамында қазақстандық бітімгершілік контингентті бірлесіп өрістету тәртібі туралы өзара түсіністік туралы меморандумды ратификациялау туралы» заң жобасы мақұлданды, деп хабарлайды ҚазАқпарат тілшісі.
Меморандумға 2018 жылғы 21 тамызда БҰҰ-ның миссияларына қатысуға ҚР Қарулы Күштерінің әскери қызметшілерін жіберу туралы ҚР Парламентінің 2018 жылғы 15 маусымдағы қаулысын жүзеге асыру мақсатында қол қойылды. Құжатпен бітімгершілік контигентті бірлесіп өрістету, атап айтқанда, қолбасшылық ету және басқару, қаржылық және медициналық қамтамасыз ету, сондай-ақ жеке құрамды даярлау тәртібі айқындалған.
«ҚР Қарулы Күштері Ливанда 1978 жылдан бастап өрістетілген үндістандық бітімгершілік контигентінің қарамағына 120 әскери қызметшіден тұратын ротаны ұсынады. Рота қажетті қарумен және оқ-дәрімен, жеке және арнаулы жабдықпен қамтамасыз етілген. Өзара әрекеттесу тәртібі БҰҰ-ның рәсімдерімен реттелген», - деді ҚР Қорғаныс министрінің орынбасары Талғат Мұхтаров.
Сонымен қатар ол аталған аумаққа бағытталатын әскери қызметшілер қажетті вакцинациядан өткенін жеткізді.
«Миссияға қатысатын әскери қызметшілерді әлеуметтік жағынан қамтамасыз ету мәселелері ел заңнамасымен реттелген. Мысалы, «ҚР Бітімгершілік қызметі туралы» Заңына сәйкес, әскери қызметшілер мемлекет есебінен бітімгершілік операцияларға қатысу кезеңінде 3 еселенген ақшалай жалақымен, шипажай-курорттық емделумен қамтамасыз етіледі. Сонымен қатар, бітімгершілік операцияларға қатысу кезеңіндегі бір айлық қызметі 1,5 ай болып есептелінеді», - деді Т. Мұхтаров.
Мұнымен қоса, БҰҰ басшылығы еліміз бітімгершілерінің дайындық деңгейіне оң баға бергені атап өтілді.
«Әскерилеріміздің БҰҰ миссиясына қатысуы халықаралық қауіпсіздікті нығайтуға айтарлықтай үлес қосады. Сондай-ақ халықаралық қауымдастықтың жауапты мүшесі ретінде, оның ішінде Қазақстан Республикасының БҰҰ Қауіпсіздік Кеңесіндегі тұрақты емес мүшелігінің қорытындысын шығару аясында да Қазақстанның беделін нығайтады», - деп түйді Талғат Мұхтаров.
Бұдан бұрын хабарланғандай, маусым айындағы ҚР Парламенті палаталарының бірлескен отырысында Қазақстанның 120-ға жуық әскери қызметшісі Ливандағы миссияға қатысатыны мәлім болды.
Сонымен қатар Қазақстан әскерилері Ливандағы бітімгерлік миссиясына әзірленіп жатқандығы айтылған еді.
БҰҰ миссиясында Қазақстан бітімгерлеріне төленетін еңбекақы мөлшері де белгілі болды.
2279 рет оқылды
