Мемлекеттік кірістер комитеті 1 сәуірде жалған ілеспе құжаттармен халық тұтынатын тауарлардың (киім, аяқ киім, косметика, ыдыс және т.б.) ірі партиясын Қазақстанға әкелу әрекетінің жолы кесті, деп хабарлайды "Ұлт ақпарат" Қаржы министрлігінің баспасөз қызметіне сілтеме жасап.
"Қырғыз Республикасынан келе жатқан 6 жүк көлігіне қатысты тақырыптық-салықтық тексеру жүргізу барысында құжаттарда Қазақстан Республикасының алушысы ретінде көрсетілген компанияның аталған тауарлардың импортына ешқандай қатысы жоқ екендігі анықталды.
Жүргізілген тексеру аясында компания басшысы импортқа қатысы жоқтығы туралы мәлімдеме жасады, осыған байланысты аталған іс бойынша материалдар тауарларды мемлекет кірісіне айналдыру мақсатында сотқа жіберілетін болады" - делінген хабарламада.
Мемлекеттік кірістер комитетінің хабарлауынша, импортқа қатысы жоқ тұлғалардың атына тауарларды әкелу әрекеті импортқа қосымша құн салығын төлеуден жалтару үшін қолданылады.
Қырғыз Республикасымен өзара саудада көлеңкелі тауар айналымын қысқарту мақсатында бірқатар жұмыс кездесулері өткізілді. Бұл мәселе 2022 жылығы 15-16 ақпанда Алматы қаласында өткен Қазақстан Республикасы мен Қырғыз Республикасының сауда-экономикалық ынтымақтастығы жөніндегі жұмыс тобының отырысы барысында да қаралды.
Оның нәтижелері бойынша Қырғыз Республикасының Қаржы министрлігі жанындағы Мемлекеттік салық қызметі 16 ақпаннан бастап экспорттаушыларда ЕАЭО елдеріне экспорттау кезінде тасымалданатын тауарға электрондық шот-фактуралардың (ЭШФ) болуын қамтамасыз ету жөніндегі міндеттемелерді өзіне алды.
Дегенмен, ЭШФ-сыз тауарларды өткізу фактілері жалғасуда.
Мысалы, тек 27-31 наурыз аралығында қытай өндірісінің халық тұтынатын тауарларын тасымалдаған 345 жүк машинасының 268-і (78%) ЭШФ-сыз жөнелтілген. Қалған жағдайларда ЭШФ барлық тауарға рәсімделмеген.
«Мемлекеттік кірістер комитеті жүргізген Қырғыз Республикасынан келе жатқан жүк автокөлік құралдарына қатысты тексерулер Қазақстан Республикасы мен Қырғыз Республикасының сауда-экономикалық ынтымақтастығы жөніндегі жұмыс тобының отырысы барысында қол жеткізілген уағдаластықтарға сәйкес келетінін атап өткен жөн, оларға сәйкес тақырыптық салықтық тексерулер тасымалданатын тауарға ЭШФ болмаған кезде жүргізіледі», - делінген хабарламада.
1078 рет оқылды
