ҚР ІІМ Төтенше жағдайлар комитетінің төрағасы Владимир Беккер Қосшыдағы ауыз мәселесінің шешілгенін мәлімдеді. Бұрынғы ұңғымаларды әлі іске қосқан жоқ. Соның орнына бірнеше ұңғыманы қазып алуға тура келді, деп xабарлайды ҚазАқпарат тілшісі.
Комитет басшысының айтуынша, жаңадан төрт ұңғыма қазылды. Қазіргі кезде үшеуі іске қосылды. Ал су баспаған алты ұңғымамен бірге қосқанда барлығы тоғыз ұңғыма істеп тұр.
«Соның арқасында көпқабатты үйлерге ауыз су толығымен берілді. Бұдан бөлек, 772 жеке үйде су бар. Енді, тағы 670 жеке үй қалып отыр. Маған түскен ақпаратқа сәйкес, жаңадан қазылған төрт ұңғыманың біреуі бүгін іске қосылады. Соның арқасында қалған жеке үйлерге ауыз су беріледі», - деді В.Беккер елордада өткен баспасөз мәслиxатында.
Айта кетейік, өткен аптада ҚР Президенті Қасым-Жомарт Тоқаев елордаға жақын Қосшы ауылының ауыз су мәселесін шұғыл шешуді тапсырған еді.
Бұған дейін ТЖК басшысы Владимир Беккер ол жердегі жағдайдың мән-жайын түсіндірген болатын. Оның сөзіне қарағанда, су басқан ұңғымаларды іске қосу мүмкін емес. Судың кеткенін күту керек. Жергілікті әкімдік сүңгуір мамандарды да шақырды. Бірақ комитет оларды жібермеуге шешім қабылдады. Себебі адам өміріне қауіп бар. Бірақ комитет басшысы Қосшының ауыз су мәселесі үш-төрт күнде шешіледі деп айтқан.
Сондай-ақ, бүгінгі ҚР ІІМ Төтенше жағдайлар комитетінің төрағасы тасқын су қоршауында қалған ауылдың жағдайы туралы айтып берді.
«Кеше, 14 сәуір күні тас жолдан Ескі Колутон ауылына баратын жол учаскесі жөнделді. Бүгінде автокөлік қозғалысы ашылды. Ал Колутон өзенінің деңгейі төмендеп келеді», - деді В.Беккер.
1624 рет оқылды
